Дагъыстанад Кьухьние Сергей Меликова выгыр ай гвалахад иджлас Правительствадид членешихьван ва мадды республикадид кьухьдыбишихьван. Гьади гьагва гьыъыр ай сахьусды лаазимды гвалахбыр, гыргасды сентябрь вазыра, выъыд республикадид кьухьнийды пресс-службадид хабардихьван.
Кувч1ур ад вазыра кьуле йыгыр йыгад сахьусды кьул хьибыд блок гвалахмыд анийиъи. Регионад Кьухьнийды кьимитдыхьван, сахьусды политикадид гвалахад – сечкимыд кампание, выгыргасды региона сесбыр ахад Единый йыгъа 12-хьусды сентябряла 14-хьусды сентября йыхы1р.
Кьва1дхьусды лаазимды блок – агъмиш выъын Дагъыстанад халкьмыд сава1лид Йыгъад байрам 15-хьусды сентябрес.
Хьибыдхьусды блока киниъи выгын гьазырвалды гыргасды сиене дуьнйадид халкьмыд ва российский форуммыс: диндид, «Каспий»-хьур джигьилешды форум, Банымыд ермыд форум ва викисды цифровой форум.
Джурад убур, мысга рыхы1д ка, йыхы1сды йиъи а1хтиетва1лид суалмыс, ва гьадыла саваенди экологиядид суалмыс, ры1кьмыд гвалахмыс, хьидмыд гьакьасабырмыс, дюзгинне ишлемиш гьыъын накьумыд ербыр..
Знаниемыд Йыгъа телемост фурмадире гыргаси Республикадид байрамад линейка, гьа йыга гвалах ваъара ка1ч1уси ц1инды кьылевыъынид идарамыра. Гьа 1 сентябрес ачых гьаъаси Великий Отечественный да1гьвиед ветеранас, Россиядид Йигитес Абдулхаким Исмаиловас гьыъыр ад памятник №28-хьусды Махачкалдид мехьтебе. Регионад Кьухьние джу ки гьади иштрак гьаъаси.
Республикади ми вазыра йикисды мадды джама1хтид ва культурадид гвалахбыр бала йиъи::
– 2-хьусдыла 7-хьусды сентября йыкьама «Россия»-хьур Национальный центра йикиси Даъыстан Республикадид презентация, гьа гедене йикиси ачыхды ихтилатбыр Дагъыстанад Кьухьнийхьван;
– 8-хьусды сентябрес, Расул Гамзатов гьухуд йыгъа, кувч1уси программа «Белые журавли». Ми сыдыыла хъуъ 8 сентябрь хасаб гьаъаси Россиядид халкьмыд ч1илмыд Йыгъ ка, Сергей Меликова шумаиди гьухьуд ка, гьа эккед ху1рмет виъи ваъара ад дур ад шаирес ва дагъыстанабишды варлыд культурадис;
– сентябрь кувч1уд хьурахъуъды йыгырма беслемиш йикиси «Доблесть гор»-хьур программадид кьылебырмыд этап.
Гьадыла саваенди, сентябрес Ватандид защитникед Сыдыс гюре ва Гьаалибдишинид 80 сен йиъидис гюре йикиси шумуд иди культурадид мероприятиебыр: гьагва гьаъаси ц1инды «Сильные духом»-хьур ва художественный фильм «Бессмертный полк»-хьур, гене йикиси ачых «Защитники Отечества»-хьур выставка «Россия – моя история»-хьур таарихдид парка.
Байрамад гвалахмык, гыргасды Дагъыстанад халкьмыд сава1лид Йыгъа, кинийиъи вручение ки дур ад дагъыстанабишис ху1кийметед наградабыр.
Приоритетный не мада йыхды яшайишед суалбыр ки. Сентябрес регионад Кьухьды маа ха1сил йикиси СВО-дид иштракчийшихьван ва гьабишды хизынмыд инсанашихьван. Выс рухьура а ц1инды халмыд ачарбыр джигьил хизынмыс Кизилюртди, Хасавюртди, Каспийскади ва Махачкалди.
Плынди а выгыргас хьур призывад комиссиядид иджлас хумухун викисды призывас выгыргасды гьазырва1лид суалад бадана ва выъын ц1инды региональный отделение «Динамо»-хьур физкультурно-спортивный обществадид. 9-хьусды сентябрес Каспийскади ачых ваъаси гене футболад «Динамо» мехьтеб.
Ми вазыра республикади Кьухьды ха1сил йикиси сасад федеральный кьухьдыбишихьван, агьмыш гьаъас хьур сельский хозяйствадид, экологиядид суалбыр ва ТКО-мыд гьакьасабыр.
Б. МЫХАIДЫ
