4-ды апрелес райондид центра, Мыха1д мукъа1, йишир ай джама1хтид субботник.
Гьади иштрак гьыъыр ай сиене идарама ад къуллухчийше, мехьтебырмыд хынимеше ва сиене джама1хтире.
Субботник йикисмаа МР «Рутульский район»-дид Кьухьные идарамыд кьухьдыбыр сыт1а дыъыр выъыр ай иджлас. Гьади хьуъ гет1ир ай субботникед суал. Райондид кьухьные выр ай указание, сиене къуллухчийше лазим йиъидкал 4-ды апрелес субботнике иштрак гьыъын бадана.
Гьа йыгъа ихьды сиене инсанаше сыт1ана, хыл-хыле выр гъаъ а1гъа1ч1ур субботнике иштрак гьыъыр ай. Сиене идарамыра йик1 сихьир балад гвалахбыр гьыъыр ай. Му1къ бадана ва джамаха1т бадана. Ра1хъбыр, кучебыр, вахбыр, идарамыд, больницадид ва мехьтебырмыд ма1хлебыр темиз гьыъыр, к1алба хъыгыр ай. Юкьсура руг-ч1ых ягъмиш, темиз гьыъыр ай.
Лап уфтанна чалыш дишир ай сиене идарамыд къуллухчиер — больницадид, Управление культурадид, ЦСОН-дид, Дом культурадид, ОКХ-дид, райондид администрациедид, ва мадды идарамыд. Джураана дирзес йыгара кьву1нды мехьтебед хынимер.
Ра1хъ-кьул, кучебыр темиз йишир ай.
Гъа йыгъа темизвалдыбыр гьыъыр ай сиене районди ад му1къма. Юкьсура инсанаше идарамыы к1алыб, усул хъывгыр ай, гъаъсурмыс, аъ суруу ширбыр, киреджбыр йыхы1р, вахбыр игъийир, ра1хъбыр темиз гьыъыр ай.
Гьамыъ ихьды бырдж шиви хьуйне — мидыыла хъуъ ки гьа к1алыб гъана му1къ темизне хывкьыр йыгара. Xalp са инсындире пластмасад шушебыр, пакетбыр хьуъ лыджыъыр, ц1ай йыхы1р йыгapa. Гьаса йишийне, ха1р са инсындире фикир выъыр йыгара, йис изды, зы ешемиш руъуд ма1хлиди темизвалды адишды, хьур, выш и тахсиркар, хьур, маъ-мереш гьухьур йигара руг-ч1ых джама1хтид ераа лаъанийде. Джишийне е мысга са сыныйы лывхарa, секкиние джу джаваъад темизвалды хы1ва1 лювуршердиш. Субботникбыр са кьухьные гьухьуйне гъыъыр йыгардиш, ха1р са ма1хлиди вазыра сада инсанаше к1аъды субботникбыр гъыъыр йыгара. Хьели му1къуу, ма1хлидыы абыр-усул викиси, гъара-араа йиркьыд мийманара ки гьухьусна, миди ад инсан темизвалды ад, захьметкеш йиъи хьур.

Насир ИБРАГИМОВ