Дагъыстанад Правительствадид Седрие Абдулмуслим Абдулмуслимова саласадид йыгъа, 23 декабрес, сыдыд ахиред иджлас выгыр ай. Гьа иджласа агъмиш гьыъыр ай суал, шууна гвалах ваъасды виъиди МЧС-мыра, энергетикеше ва мадды лазимды идарамыра цIинды сыдыд байрамад выхадниед йыгъырма.
Гьади иштрак гьыъыр ай Республикадид МЧС Россиядид министерствадид кьухьние Нариман Казимагомедова ва мадды министерствамыд кьухьдыбише.
Лаъ гетIир ай гьакьасабыр, шыв аIхтиетвалдыбыр гьыъыр йыгарди праздникед йыгъырма.
Абдулмуслим Абдулмуслимова иджлас бешлемиш выъыр, ихтилат гьыъыр, шудаъ лаазимды иди гвалах выъын чрезвычайный ситуациямыс хаIммише. Амма ихьды хуIкийметед гъаъсуруу ад агьвалат гюзет выъыйне, гьухьур Абдулмуслим Абдулмуслимова, мааки йыхана выъыр йыгара гьазырвалды ихьды инсанашды бадана ва гьабыр, лазим йишийне, аIхтиет даъасна гражданский оборонадид укрытиема. Гьание гьухьур, Дагъыстан Республикади выгыр а лазимды гвалах, гьацIара гьаъасды, шыв хаIле ади гражданский оборонадид укрытиебыр. Гьазыр дыъын инсанар хаIр гьаъас лазимды гражданский оборонадид гьакьасабыр бырж йиъи идарамыд кьухьдыбишды.
Дагъыстанад гражданский оборонадид ва инсанашды защитадид Управлениедид кьухьние Магомед Магомедова иджласа ихтилат гьыъыри правительствадид седриес, шыв гьыъыр ади кьухьдыбише инсанашихьван сытIа гьазырвалдымыд сураа джетинды агьвалат вишийне республикади.
Гьание гьухьур, кьухьдыбыр гьазыр даъас гвалах выгыргара а ГБОУ РД «Учебно-методический центр по ГО и ЧС» идарадире ва гыргара а курсбыр гражданский оборонадид Каспийскади ва Хасавюртди.
«2024 сыда УМЦ по ГОЧС идарадире хаIр дыъыр а 2379 инсан… Главный управлениедире выр методический куьмег кьуле эдисне инсанар, выгыргара а гвалах гьадид сураа ГО ва ЧС идарамыд къуллухчийшихьван…
Гьа гвалахбыр йыхана йыгыр а 2024-хьусды сыда Махачкалди, Каспийскади, Кизилюртди, Избербашди ва Хасавюртди», — гьухьур Магомедова.
Джураана агъмиш гьыъыр ай суал январед каникулмыс выгыргара ад гьазырвалдымыд идарамыд кьухьдыбише.
Гьа суал гъанийиъи Дагъыстанад Кьухьнийды Сергей Алимовичды контроляа.
Именно гьа йыгъырма руъуд йиъи пожарбыр, дыркьынбыр ва мадды-мадды писды агьвалатбыр, гьухьур кабминет кьухьние.
Шыв гвалах выгыргара ади гьадис гюре ихтилат гьыъыри Россиядид Дагъыстана ад МЧС-мыд Главный управлениедид кьухьнийды заместителере Сулейман Рамазанова. Гьухьур ай, 28 декабряла 9 января йыхыIр гвалахбыр гыргасды йиъи усиленный режима.
Гьадис гюре сиене министерствама на ведомствама сигыр а рекомендательный кагъатбыр.
Пиротехникамыд бадана МЧС-ре полициядид къуллухчийшыхьван сытIа выгыргара а гвалах гьацIара гьаъас хьур, гьили гьабыр масак вылцIара ади ихтияр хадишне.
Байрамад йыгъырма инсан бала ад джигима пожарникеше не спасателеше гыргаси дежурствабыр. «112» службадире мадды лазимды идарамыхьван сытIа гьа йыгъырма джатIур гвалах ваъаси.
Районмыд кьухьдибишде гьазырвалды ваъ, хьур а, мысга саджатхъаIсне тукад йаькв йишин бадана юкьсура.
Юкьсура идарама гьа йыгъырма гьаъ хьур а дежурствабыр.
Сиене гьазырвалдыбыр гьыъыр бегьем диъи энергетикер, гьухьур Дагъыстанад энергетикадид ва тарифмыд министре Марат Шихалиевара.
Агъмиш гьыъыр ай ми суалмыхьван кине ЖКХ-дид гвалахбыр ки республикади ва гьабишды гьазырвалдыбыр, эгер гьилига хьидид ва мадды дурбабыр тIутIкьуд ва гьасад гене джетинды гьакьасабыр йишийне.
Иджлас бегьем вуруъуди Абдулмуслим Абдулмуслимова сагъул-варулбыр гьыъыри гьаатхыIд сыда выгыд гвалахад бадана МЧС-мыд министерствадис ва гьадид къуллухчийшис.
Б. МЫХАIДЫ
