16 декабрес МыхаIд райондид джамахаIт Къурасура маIхлиди ад сырымыы ягъмиш вишир ай гьанкьудис — гьади гьа йыгъа кирхьере ай СВО-ди йикьид йигит ка ихьды МыхаIды эскер Муслим Исмаилович Раджабов.
ГъыIнне 2024 сыда Муслим шу, кихьир Россиядид миноборонадыхьван контракт, йикIяа лувзур йыхьыри иштрак гьаъас Украинади гыргара ад спецоперациеди.
Раджабов Муслим Исмаилович гьухуд йиъи 12-хьусды январес 1976-хьусды сыда МыхаI. Гьание МыхаIд 2-хьусды мехьтеб лаабтIа выъыри 1992-хьусды сыда.
Гьадыла хъуъ Муслиме гьаъара ай устар пешебыр. Бала уфтанды кьвабырды устар йиъий гьа — Муслиме цIиндикене хъывыъыри кьваIб мездик: са МыхаI Къурасуру маIхлиды са ки ХыIныIхъ муIкъаI.
МыхаIд райондид джамаIхтире эккед кьимет выр ай Муслимды выъыд йигит гвалахас — хылик къизилед пешебыр кине, са повесткаки адишне, выдж, джуды йикIяа, добровольно йыхьын даIгьвиди Ватан бадаана сахьусды лаъ хъуд гьунар йиъи гьанийды, хьур.
Октябрь вазырыла хъуъ Муслим связмы гъамардиший, эхир гьеми йыгъырма хъибкьыр мисед писды хабар — Муслим йикьир, хьур, даIгьвие иштрак гьаъара ана ва гьанийды майит ахъыгыр а, хьур.
Ихьды атабабыйше рухьуд йиъий — Элигъание йыхды инсан джухда, джуды бегеде гыргара, хьур. Муслим йыхды инсан йиъий, хьур, сырыы гъад сиенебише рухьура ай — йикI ачыхды, хуIрмитдид, эдемивалды ад, гьидылана гиджичIед, са инсанада ки «ваъ», хьур, джухьуд, джуду бегеде куьмег ви, хьур, йыдкьыйне, гьаасад йигит дух йиъий.
Муслим кихьис сырыы йидкьыр ай йукъсура: райондид муIкъма, къумши районма.
ДжамаIхтид дугьаIмыхьван на пограничникешды салютахьван рыкъаI ийир йигит Муслим ти дуьнйадыы.
Джуды сыр Нурдид йикий! Аллагьара раIхмет выъый!
Дженнет къисмат гьыъый ихьды йигитне гьаархыIд Муслимис.
Муслимыхда хала мада къари не хьиб велед.

Насир Ибрагимов