9 декабрес ихьды хуIкимете агъмиш выъыр ай цIинды байрам — Ватандид Йигитешды йыгъ.
Гьадис гюре МыхаIд райондид кьухьды Давуд Амаевич Сулейманов йыхьыр ай хала Садыков Ибрагим-Паша Султановичахда — районди марад са ветеранахда, гъийгъа ешемишды Махачкалди.
Ибрагим-Пашад дур гьацIара сиъинбишис ихьды Россиядид Президент Владимир Путине Кремлиди кьабыл гьыъыдыла хъуъ шесне май вазыра Йигитед къизилед хаIдий выс, хьур. Гьа хаIдий выр ай Йигитес 100 сен йишийне республикадид кьухьнийды Сергей Меликовад хайишехьан.
Ибрагим-Паша Садыков — ихьды МыхаIд райондид дамах виъи, гьанийды йигитед гвалахмыхда гадкьыр гъийгъа ихьды джигьилеше ки джуьхьды йигитвалды гьувгаваъара а специальный военный операциеди, Украинади ихьды хуIкиметере гыргара ад.
Давуд Амаевич мадды райондид кьухьдыбишихьан сытIа хаIр байрамас джыхьыр субкьурдиш ихьды райондид ешлид, дур-ун ад сиене валаетди Йигитахда Ибрагим-Паша гыгыйихда. Ми хылиски Ватандид Йигитешды Йыгъ къутли гьыъыр райондид кьухьние И-П. Садыковас, хуткун-суалбыр гьыъыр аксакалада, шууна виъиди гьанийды сагъвалды, гьацIара гьыъыр, ама, хьур, йыгад-джигад.
Ибрагим-Паша эккене рази йишир мийманашы, хуткунбыр гьыъыр джуду суруула, шыв агьвалат ва гьакьасабыр ади районди гъийгъа, шыв куьмегбыр гьаъара ади СВО-дид иштракчийшис ва гьабишды хизынмыс.
Эккене сагъул-варулбыр гьыъыр райондид кьухьнийис ва сиене инсанашис, выдж йикIила урха джаъад. Гьади чейбыр рагъара гене балад гаIш-мыкьбыр гьыъыри ихьды Россиядид Йигит Ибрагим-Паша гыгыйихьан.

Насир ИБРАГИМОВ