Тирджед гьаIфтидид кишды йыгъа Махачкалди ад Ленинды дур выр ад майданаа джамахаIт бала анивиъий. Гьади гьа йыгъа хьуъ гепIир ай замхаIткешешды хылыра лешур ад маIхсилбыр гьагва гьаъад бала варлыд ярмарка.
22-ды Дагъыстанди ад районмыра ва кьухьды дур-ун ад улесдыбыр агъахад предприятиемыра иштрак гьаъара ай гьа маджлисе. Джаргыдире, уIхшерне сихьир, дуьз-дуьзгюн гьыъыр, хыле выр ай савда ачых ваъасды павильонбыр ярмаркадид иштракчийшде.
Гьади хьуъ гетIир ай джурба-джура карбыр, хъивыкьыд, уле луьвгъуIд ер-емиш; малдид, чIабалад, кIатIырды, балгъуд як ва къуру гьыъыр ад як, ацIыдбыр, банкIама гьухьур ад гьазырды говядинабыр, хаIлал, хьур, сертификат хъуд. ХьаIликана гьади ай наIкыдыкла келъед гъахьун-гъара, хуIр-сук, хаIр джурыдид урбечбыр, темизды итбыр, Дагъыстанди лиркьад емишекла кетIир ад уIкъды сокбыр ва мадды улед-рагъадбыр.
Гьадыла саваенди площаде гини йиъий экI-даIк таарих гьагва гьаъад, улихьтед усул ад валыгмар, лытIыд къаб-дур, къалый выр ад, дыныд ухуракла рыхыр ад сукуй-чивек.
Тисене площадед убруу ка гини йиъий машинбыр сельскохозяйственный гвалах хьуъ выгыргад.
Арад кьуле дуьз гьыъыр ай кьухьды сене нагьнибыр на мукIбыр гьаъара ад Дагъыстандид творческий коллективмыра.
Ярмаркади йидкьырадбишы салам сувгъури Дагъыстандид кьухьды Сергей Меликова, Абдулмуслим Абдулмуслимова, Мухтарбий Аджекова.
Сергей Меликова сенидыла гьалгад гедене, кьыле гьыъыри АПК-дид шыв гвалахбыр кьуле гыргас лечIур ани йиъийди джубраады сыдырма ва шыв лаъвалды вишир ади гьа сферади.
Махачкала шегьердид агъаалиер гьа ки диъине ай площадяа, ярмарка ад гьацIыйне, гьабише лепшура ай муIкъмаа йидкьыр ад темизды улесдыбыр ва мадды хала лазимды карбыр. Йыхды мачхулат йишир ай гьабишис сиене гьади йидкьыбишис.

Зарема Исрафилова