21 октябрес Дагъыстанад маданиетед не миллитмыд чIилмыд Йыгъа республикади йыгыр ай акция «Дагъыстанабишды чIилылад диктант»-хьур. Гьа диктант кихьир ай Махачкалди ад Дагъыстанад магьаIлимешды университете ки. Филологиядид факультетед гьа йыгъа ракбыр ачых йиъий сиенебишис: гьалыс йигарди, йитIкьыр джус джуды чIел йыхана вацIараъама хьур гьацIара гьаъасды чараа анивиъий. ХаIрне, гьа йыгъа 14 джура дагъыстандид чIилмыла 300-ды инсанара кихьир ай диктант гьа университете.
Дагъыстанди гьеми акция гыргара ад 9-хьусды хыл йиъи ва гьади иштрак гьаъабыр сен-сыдыла бала дуруъура а.
Акциедид иштракчийшы салам сувгъус йиркьыр ай Дагъыстан Республикадид национальный политикадид ва динмыд гвалахмыд министр Энрик Муслимов. Гьание мисе гьухьури: «Гъийгъа выгыргара ад гьеми гвалахара балана куьмег вырцIара дагъыстанабишды чIелбыр ва гьадатбыр ухуIнид сураа.
Нинды чIел — хаIр миллитдид йикI йиъи, гьадыла йе балана чалыш диъи халкьмыд чIилмылады хаIр-джура китабыр игъиес.
Гъийгъа миди 14-ды джура чIилыла кирхьера ад диктантад сахьусды везифе виъи хаIр дагъыстанад миллитдид чIел увухуIн ва инсанашис мааки йыхана чIел хаIр ваъасды гьаIвас выъын.
Урус чIел артухана вацIара вишийне, зиян адиш — гьис хьуйне, гьа чIилыхда йе-ваI сиенебыр гедыркьара, са-сынийихьван далгас руъура, амма нинды чIел, таарих ва гьадатбыр ки йикIила утха джыыъыр йигара. Эккед сагъул гьухьус йигара ДГПУ-ед ректорас Нариман Асваровыс гьемисе бытIрана гъийгъад гьеми маджлисес убур выр ад, йыхана гьазырвалдыбыр гьыъыр, кьуле выгыргара ад.
Гьеми диктант дуьзене, бытIрана кихьибишис Дагъыстанад Миннацара на ДГПУ-ере ведомственный наградабыр ва подарокбыр выс хьур хываI лешур анийиъи», — гьухьур Энрик Муслимова.
Диктант кихьир бегьем дишида хъуъ сиене сытIана хъыдхьыр ай гъаъ университетед маIхлиди, гьади йидкьыр ад мийманашис гьувга выъыри дуьз-дуьзгюн выъыр ад маIхле. ХаIр халкьдид подворьемыда ачых гьыъыр ай выставкабыр хаIр джура эвелды кардымыд, валгымыд, эвелды гвалахмыд аIк-даIкIмыд. Юкьсура ун ай макьаммыд, наIгьнимыд ва сихьир ай джурба-джура улесдыбыр, кывыс, хьур, гьади йидкьыр ад сиенебишис.
Гьасад диктантбыр кихьир ай хаIр районмыд мехьтебырма ки. МыхаIд районди ад сиене мехьтебырма ки йыгыр ай нинды чIилыла диктантбыр.
Зарема Исрафилова
