29-хьусды октябрес Москвади гьаIсил дишир Москвадид ва сиене Русьдид Патриарх Кирилл не Дагъыстанад кьухьды Сергей Меликов. Гьади иштрак гьыъыр Дагъыстанад муфтие, шейх Ахмад Афанди Абдулаева ва Махачкалдид не Грозныйед архиепископ Варлаама. Агъмиш гьыъыр ай сытIад гвалахбыр хуIкиметед идарамыд на духовенствадид миллитмыд арымыд саваIлид сураады, джигьилешис дюзды тербие вынид сураады, са ки кьылеваъад джигима телебийшды кьалбыд бадана валгыд суруула уу лаъад.
Республикадид кьухьнийде Урусашды Православный Килиседид Кьухьние мисе гьухьур: «Йе Выды гвалахас эккед кьимет вылцIара, Сергей Алимович. Балад умуд ваъара, Элигъанийды кюмгихьван Вада йикиси, ишлемиш гьаъара эскерваIле Ватан увухуIд вахтинди йишид опытахьван, Дагъыстана сабырвалды на секинвалды хывкьас, гьадыла асыллы виъии балад сураа секинвалды сиене Россияди ки. Къисмат йиший Вас эласаъ кюмег, дирибашвалды ва гьакьал Выды джетинды гвалаха».
Регионад диндид суруула муфтий Ахмад Афанди кьуле гине мисе гьухьур: «Баласды Дагъыстанад мусурманаше Выды хуIрмет хывылкьара. Гьадыла саваенди, Вы чалыш йиъи кюмег выс республикади ад мадды динмыд инсанашис ки, гьадис гюре ваъара эккед сагьул. Теракт ад йыгьырма, йес гьацIада, муфтията кюмег выс чалыш виъий сиене гуджеыдхыIбишис», — гьухьур Святейший Патриарх Кирилле.
Гьание Махачкалдид не Грозныйед архиепископ Варлаамда мисе гьухьур: «Вы ад джигидыла, гвалах ваъад ераала асыллы йиъи балад гьакьасабыр Россиядид. Гьа эккед чIелбыр диш, йисхьурди, эгер Дагъыстана саабырвалды вишийне, гьа угут виъи маддыбишис ки. Гьадыла Вас раIхим бала вийхь гвалах ваъараъад гьасад эккед таарих ад ва дин ад Дагъыстана».
Гьалгыри 23-хьусды июнас йишид гьакьасабырмыкла ки. Гьухьур, гьа гвалахбыр сада диш руъура ад, гьацIадбыр йиъи. Амма Дагъыстанад кьухьдыбише, халкьдире йыггад дживаб выси террористешис не экстремистешис, гъадубгъура ад мадды гъараады хуIкиметмыра.
Варлаама гьухьур, гьа гвалахмыра мааки гъийгъе, гуджли выъыри Дагъыстанад миллитмыд савалды. «Ихьды кьулу йыгъ йыдкьыйне, кюмег выс чалыш дишир сиенебыр, ва шейх Ахмад сахьусды йиъий гьабишикла. Ми вахтинди республикадид кьухьнийды ва ихьды мусурман шубаIшды кюмгихьван Дербентди ремонт гьаъара а храм на причтовый зал, Махачкалди ад духовно-просветительский центр полностью цIине хъаъара а», — гьухьур иерарха.
ХуIрмитдид арабырмыла православныйшды на мусурманашды балад гвалахбыр асыллы йиъи валаетед саваIлид сураа, гьухьур Урусад Православный Килиседид Предстоятелере.
«Гьабыр мааки махкам гьаъара, гьагва гьаъара ихьды шубаIшис не ришиймашис, йе гьабыр хырыда даъара ихьды гъараады душманашила, чалыш диъид дин хьури хакьыр быш ваъас Россия ва арыди кин ийис ихьды динмыд», — гьухьур патриарх Кирилле.
Терактала хъуъ гьаъара ад Дагъыстана гвалахмыд сураа Москвадид ва сиене Русьдид Патриарх Кирилле эккед сагъулбыр гьыъыри джуду суруула.
Республикадид кьухьние сагъулбыр гьыъыри патриархас республикадид чалышваIлис выд эккед кьимитдид сураа. Сергей Меликова гьухьур, гъийгъа Дагъыстан виъи кIаъды Россия сиенемыд суруула.
«Ва гьа рухьуд чIел виъи, йис иди Дагъыстана чалышды амзырбыр гьаъас ихьды саваIлид гъигъваIликла: ва гьа кар лечIухьна, йикиси сиене Россияди ситIе гьаъас лудкье джетинвалдымыд сурухда. Гьадыла йиъи йе чалышды гъийгъа дикис ари, сытIа, Ва рухьуд ка. Выды Святейшество, йе гьекъийкъат хывылкьара республика ихьды валаетед модель ка ва мысга чалыш дикис гьа Кавказди ад модель увухуIс гьаса сакална, шууна чалыш диъиди ихьды эккед Россия бадана», — гьухьур Дагъыстанад кьухьние.
ХаIсил дишинис гюре, Дагъыстанад муфтиес выр ай эккед награда Урусад Православный Килиседид — орден Славы и Чести (ll степени). Гьадыла хьурагине гьасад орден выр ай архиепископ Варлаамыс ки.
«ЙикIиыла къутли ваъара Вас, хъыгад шу, ми эккед награда, къисмат гьаъара Вас сагъды джан ва кьуве ва вахьван сытIа — Дагъыстанас лаъвалды ва йигит халкьдис республикадид ки», — гьухьур патриарха.
Республикадид муфтие сагъулбыр гъыъыр патриархас эккед наградадид сураа, хывкьыр гьа кьимет ка выр ад сиене дагъыстанабишис.
«Гьа йес лап лаъ хъуд гвалах виъи ва лаъ хьуъна хадкьын ихьды диндид кьухьдыбыр увухуIнид сураа миллитмыд савалды.
Гьа гвалах дишме гьувга ваъад ихьды савалды на арахавалды? Йеда йикис лешус, хакьас хаIр са дин. хаIр джурана кьабыл ваъас гьуIмир, амма адгаси мысга са россиядид халкь ка, йешемишды са фикирмыхьван на везифемыхьван», — гьухьур Сергей Меликова.
Регионад кьухьние сагъул-варулбыр гьыъыр патриарх Кириллис Дагъыстан ва дагъыстанабыр йыхана хадылкьадыла, хываI лювшудыла Дагъыстана ад савалды инсанашды арыди.
Сергей Меликова гьухьуд ка, Дагъыстан — республика виъи, кьыблаахъуъ гьацIара ад, шыв кар иди хывкьын хуIрмет ва миллитмыд шубаIвалды, гаджадкьыр чалышвалдымыхда ихьды арыди кин ийис.
«Патриарх Кирилл – бала гьакьаллы, ачыхды инсан йиъи, мысга дюзды кьимет вылцIад гьаIр са гвалахас ва сиене гьаъад, христианашды на мусурманашды арыди хуIрмет вишин бадана. Гьасад ине йес гьацIара ихьды хуIрметли муфтий ки, мысга инсанашда хайиш гьаъад саваIлихьван ешемиш диш, хьур», — гьухьур республикадид кьухьние.
Б.МЫХАIДЫ
