17 октябрес Дагъыстанад кьухьды Сергей Меликов «Россия – моя история»-хьур таарихед парка хаIсил йишир Мехьтебед футболад лигадид чемпионашихьван ва «Зарница 2.0»-хьур сиенероссиядид военно-спортивный дюльхъинмыд финала сахьусды ер хывкьыбишихьван округад этапа.
Республикадид кьухьние ихтилатбыр гьыъыр телебийшихьван на гьабишды магьаIлимешихьван, гьадыла хъуъ выр гьабишис подарокбыр на сертификатбыр.
Мехьтебед футболад лигади Дагъыстанди анидиъи 260 гьагъзыр телеби. Гьади сытIа йишир ай 750 кьылевыъынмыд идарабыр. Мистед сыда соревнованиема сахьусды хылис иштрак гьыъыр 22 рышбишды командадире. Беслемиш гьыъыр а «Футбол в коррекционной школе»-хьур проект.
Махачкалдид «Футбольный клуб «Динамо» вулхъара а гъийгъа премьер-лигади. Джигьил дагъыстанабишды футболистер ледкьыр гьасад дараджия, хьур, хьурагинды сыдырма еда са фикирди гыргас руъур диший. Гъийгъа гьа клубад йыха йишир йыгара сиене гвалахбыр йыгъ-йыгъаала. Ес умуд а, гьа дараджия ваI ледкьас хьур», – гьухьур джигьил спортсменешде Дагъыстанад кьухьние Сергей Меликова.
Мехьтебырма «Зарница» выгын – эккед гвалах виъи хынешис Ватан хъывгара ваъад тербие вылцIад сураа, гьухьур Сергей Меликова гьа арыди.
Мистед сыда дюлхъинма иштрак гьыъыр ай 800 гьагъзыр инсындире 89-ды регионмады. Дагъыстана иштрак гьаъасды заявка выр ай 27 гьагъзыр инсанара.
«Зарница 2.0» – хьур военно-патриотический дюльхъинма иштрак гьаъара а сиене телебийше ихьды валаетди. ХаIр отряда а йывыр инсан — командир, штурмовик, оператор БПЛА, духтур, политрук, сапер ва военкор.
Иштракчийше гьагва гьаъара гьунарбыр хаIрса джура областма: тактический медицинада, огневой ва инженерный гьазырваIля, БПЛАбыр управлят гьыъына ва гьабыр йыхыIна, топографиедид ва спортад ориентированиеда, кибербезопасноста ва гьацIынваIля Россиядид военный таарих.
«Йе гьаъара а сиенебыр, ихьды аалалаъ диъидбишис хаIр гьаъас йыгара йишин бадана джуьхьды вилаетдид таарих, гьацIара йикисне мыхьджеб не дюзды гвалах, джатIур иштрак гьаъасна кьылебырмыд ва ватан хъывгынваIлид проектма. Ва гьадид сураа Всероссийский военно-патриотический «Зарница» -хьур дюльхъинбыр йыгын кьылебыр гьаъад идарама сахьусды гвалах виъи ватан хъывга ваъад тербие вынид сураа телебийшис», – гьухьур Дагъыстанад кьухьние.
Гьа йыгъа подаркабыр республикадид кьухьнийды хыляа выр ай Махачкалдид №5-хьусды Лицеед командадис. Джигьил спортсменеше регионад сураа иштрак гьыъыри «Кожаный мяч»-хур Мехьтебед футболад лигадид финала ва хывкьыр сахьусды ер.
Къутли выъыр Сергей Меликова Кизлярский райондид команда ки – сахьусды вишид округад этапад финала Всероссийский военно-спортивный «Зарница 2.0»-хьур дюльхъинма.
Гьание гьыъыр къутливалдыбыр всероссийский конкурсма сахьусды ер хывкьыбишис ки:
«Эдеми гъаалибваIлиы лийкьара, эгер чалыш йишихьвна джичIесды кар ки гьаъас, дирибаш йикис балана. Къисмат ваъара ваIс ладжапIтIусды кьувет, сахьусды кьул, ваI инаамиш дишин сиене кар йичIес хьур ваIдяа. Выхьди магьаIлимешис не дидабашис – сагъды джан, сабырвалды», – гьухьур иштракчийшде регионад кьухние.
Выдж ки, Дагъыстанад кьухьды, убур джыхыIр сатырдиш. Сергей Меликовыс выри медаль Дагъыстанди хынимешды футболас куьмег вылцIадыла.
Награда гьанийис хьур гьазыр выъыр ай джигьил спортсменеше Махачкалдид №5-хьусды лицеед.
Гъаалиб вишид футболад командид капитан Батыр Магомедова сагъул-варулбыр гьыъыри регионад кьухьнийис.
Хьели Дагъыстанад кьухьние сес выъыр сиене сытIа дыхьыр ай Махачкалдид «Динамо» вулхъад джигиди — «Анжи Аренади» ЦСКА-дихьван.
Сергей Меликовахьван ми шикилек кид хыных йиъи МыхаIды Карчигаев Исрапил Эльманович, Махачкалди №5-хьусды лицее кьыле ваъара ад.
Б. МЫХАIДЫ
