Ихьды МыхаIд райондид почетный инсанара Гасангусейн Абдулджелилова ихьды газетед редакциеди сигыр ай кагъат сагъулбыр гьаъара хьур районид кьухьнийис ва мыхаIды устарашис Расул Гамзатовды дур гъад Дагъыстандид хуIкиметед магьаIлимешды университетед маIхлиди гьыъыр ад ерлид духлакла уфтанды мас сихьир а хьур. Гьади гьемисед чIелбыр кинийиъий:
— Ми йыгъырма зы йыхьыр ай Расул Гамзатовды дурухда хъуд университете. Гьадид маIхлидаа зас гьагури гьади гьыъыр ад ихьды ерлид духлумыкла бала уIхшердид мас, гакъасды кьваIб ул виъи выгад.
Ихьды, мыхаIбишды, культура лап варлыд виъи, гьадире ихьды савалды, хуIрмет ва нуIгьибет гьувга ваъара ад виъи.
За изды сураа ваъара эккед сагъул МыхаШд райондид кьухьды Давуд Амаевич Сулеймановас ва гьа мас гьыъыр ад дур-ун ад VыхаIды духлад устарас Абутдулла Раджабович Раджабовас ва Мирзабек Азизхановыс ки гьасад уфтанды гвалах выъыр ад гьемиди. Гьакъийкъатды мыхаIшура ка зы эккене рази йиъиъ ДГПУ-дид маIхлиди мисед гвалах выъыр а хьур.
Йыхана йикиси ми композиция выъыр ад джигиди сытIаа дыъыр ихьды райондады студентер, гьаIлимер ва гвалах кьуле выгыр ад усдарар ки гьагва гьаъас гьеми уфтанды гьыъыр ад гвалахбыр. Гьа арыди гьаъас гьабишис ихьды таарихед ихтилатбыр ва гьаъас эккед сагъулбыр райондид кьухьнийс не устарашис.

Насир Ибрагимов