15-хьусды мартала 17-хьусды марта йыхыlр Мыхаlд района, сиене хуlкимете ка, йыгыр ай Россиядид президентед сечкибыр. Гьа сечкибыр лазим йиъидкал кьуле йыгын бадана, райондид администрациедире, сельсоветмыра, райондид избиркомара выгыр ай эккед гвалах. Сиене сытlа районди ачых гьыъыр ай 47 сесбыр ийисды участокбыр. Гьабыр ягъаlд ка кlалба-усла йыгыр ай, сыхыlр камерабыр, гьазыр гьыъыр стационарный не гъаъ-аъ вихисды ящикбыр сес ивед, йыхыlр участокмыд аъсуруу-гъаъсуруу лаазимды агитационный банербыр, кандидаташды буклетбыр. Са чlилихьван, 15-хьусды майяйыкьама сиене гьазырвалдыбыр бегьем гьыъыр ай.
Гьа гвалахбыр гьаъара кваlчlусмады 14-хьусды марта йыхыlр райондид кьухние Давуд Сулейманова хаlр выгыд иджласа сиене идарамыд кьухьдыбыр ана гьа сечкимыд суал агъмиш гьыъыр ай. 15-хьусды мартас районди ад сиене сесбыр ахад участокбыр сагьаlт 8-дис ачых йишир сечкибыр кваlчlури.
Сахьусды сес ивис дуруъура кваlчlури йаьквала хъуъ йеш хъишид акъсакъалар, СВО-дид иштракчийшды дид-нин, бегедебыр. Сес ивидыла хъуъ гьабишды сиъинбишды ихтилат са йиъий — йыдкьыр сиъинбише сес выр гьувга выъыр йыгара джамаlхтид савалды, ихьды хуlкиметес джетинды вахтинди, сиене гъараады душманашды хъаlлес.
Сасад инсанар сес ивис йыдкьыри хизынмыхьван, хынимер ки хана. Меселла, сиене хизындихьван йыркьыр ай сечкима ихьды «Мыхаlбишды цlинды хабарбыр» газетед баш редактор Тимур Махмудов.
Инсанар диъий сес выс джуьхьды гьашкьдыхьван, гьалдына миннет кидишне, шадана.
Хьибды сечкибыр ад йыгъырма са нагьакьды, чlирид, лазимсызды гьакьасабыр секки избирательный участока йиширдиш. Гьадид сураа эккед сагъул виъи ихъды райондид Отделед полициядис, хаlр участока йаьквала нахаlды йыхыlр ай полицейскиер.
Балад гвалах йыгъа-выше выгыр ай ихьды журналистеше ки — джатlур сихъвиргара хабар сечкимыд республикади, лювуршере интервью сес ивидбишда, дур-ун ад инсанашда, къуллухчийшда ва маддыбишда.
Мехьтебырмыд директорар, сельсоветер ва мадды идарамыд кьухьдыбыр гвалахмы ай хьибды йыгьа. Сечкимыд итогмы бала рази вишир ай Мыхаlд райондид джамахаlт. Сиене сытlа районда Владимир Путинес выр ай 94,42 процент сесмыд, иштрак гьыъыр ай сечкима 93,1 процент инсанаше.
#Этномедиахолдингголосует
Б. МЫХАIДЫ
