27-хьусды июлес сиене Россияди йыгыр лаазимды магьра1катбыр, хынимер йик1ыы хъыдгас герекды – дыркьыд да1гьви ана Донбассди.
Дагъыстанди гьасад мемориальный магьра1кат митинг фурмадире йыгыр ай саджалхъа1д ц1ыед бегеде Ленинский комсомолад дур гъад парка ад. Гьа магьра1кат выгыргад гедене, хынимеше джигьилешды движениемык кид, кьыле гьыъыр ай Донбассдады на гьадид сарха1та гъад российский регионмады хынимешды дурубыр, дыркьыд залымды да1гьвиди.Дурумыла гъайри, ягъмишдишибише йик1ыы хъыгас кьыле гьыъыр ха1р йикьид зурламатдыхьван к1аъды хынхыд ц1амды таарих, йик1ыы лахъахара гьадыхьван сыт1ана бала писды, лазимсызды гвалах виъид дыркьа дыъын да1гьви джавъара ешемишды инсанар. Ягъмишдишибише йик1ыы хъыдгыр дыркьыбыр гийтхьир са т1екьийкьеды.
Мийманарна гьа магьра1катди иштрак гьыъыр ай РД-над Кьухьнийды ва Правительствадид администрациедид къуллухчийше, сахьусди СВО-ди ана Россиядид Йигит йишид эскеред нине Сапижат Мазаева, Махачкалдид кьылебырмыд Управлениедид кьухьние Шаганэ Баймурзаева, СВО-дид иштракчийше, да1гьвимыд ветеранаше, общественный деятелеше ва мадды баладбише.
Сахьусды кьухьды магьра1кат гьа йыгъас гюре выгыр ай Москвади, Поклонный банаа гъад Гъалибва1лид Музеед ма1гьлиди. Мемориальный проект кьуле гыргадбыр диъий СВО-дид ветеранашды Ассоциация не ва (КСВО) - Ватандид эскерешды хизынмыд Комитет.

Зарема ИСРАФИЛОВА