Каспийск шегьерди выгыр ай РФ-дид ВМФ-ад тааликьды байрам.
Гьади иштрак гьыъыр ай Дагъыстан Республикадид Кьухьды Сергей Меликова. Ми байрамад мероприятиемыд арыди сиенемыла гуджлине йыгыри Каспийский дерйагьа Ирды пайдах хад Каспийский флотилиядид гемимыд парад. Миди контр-адмирал Олег Зверева ва генерал-полковник Сергей Меликова эскерешды «Альбатрос» катера люздир гьыъыри морякашис джухьды байрамад йыгъ нубараг.
Каспийский дерйагьад хьиды уу миди ад мийманашис ва гадкьаIс йитIкьыд инсанашис парадад арыди гьагва гьыъыр ай мисед услад эскерешды гемибыр: ракетныйбыр, артиллерийскийбыр ва гидрографическийбыр.
Гьамыд арыди кини йиъий:
— ракетный геми «Дагестан»;
— кIаъды ракетный геми «Углич»;
— кIаъды артиллерийский геми «Волгодонск»;
— эскерешды базовый тральщик «Магомед Гаджиев»;
— кьухьды гидрографический катер «Николай Ивашинцов» ва са ки рейдовый катер «РВК-933».
Гьадыла саваенди, Военно-Морской флотад Йыгъ агъмиш гъаъара, дагъыстанабишис ва миди ад мийманашис дерйагьад къирхыда гьувга выъыр ай театрад усулбыр ад представление «Приветствие Петра I» хьур сцена ва эскерешды на палыванашды мероприятиебыр.
Ми морякашды байрам виъид йыгъа Россиядид Президент Владимир Путин ки, къутливалдыбыр гьаъара, прямой эфираа гьалгыри – минийды чIелмыхда хъадацус йишири сиене Каспийск шегьерди ад инсанашдаа.
«Ми байрам йе-ваI агъмиш ваъара лап шадана, лап элаа хакьыр ихьды дур-ун ад флот, лап дамах хана ихьды гьуIкиметед дур – дуьнйадид дерйагьад державадид», — гьухьури Президенте В.Путине.
Ми байрамад йыгъа хьидыы ва накьудыы Каспийский флотилиядид эскереше гене ки гьагва гьыъыри сиене миди ад мийманашис даIгьвидид услад боевой действиебыр. Дерйагьады ва къирхыдады эскереше гьагва гьыъыры, шууна гьуIкиметед саргьаIтала харкьарди нарушитель, шуунаа хьиды минабыр гихьид ераа раIхъ ваъарди ва маддыбыр.
Гьадыла саваенди, Военно-Морской флотад Йыгъад байрамад арыди йигитвалды ва векIегьвалды гьувга выъыд Каспийский флотилиядид дерйагьады эскерешис Дагъыстандид ва Каспийский флотилиядид кьухьдыбише выр ай гьуIкиметед наградабыр.
Къинады САИД
