6 майес Амцурдыди сельсовете ад К1аълиде му1къа1 ачых гьыъыр ай да1видид ветеранашисды хатиресды памятник.
Сагьа1т 10-дис К1аълиде ад мехьтебед ма1гьлиди сыт1а дишир ай джуьхьды ва Амцурдыды му1къу1д джамагьа1т.Гьади мийманва1ле йит1кьыр ай Мыха1д райадминистрациядид, Амцурды, Лучек, Къина му1къмыд сельсоветер ва мехьтебырмыд директорар, полициядид ва пограничникешды къуллухчиер ва маддыбыр.
Сифтене миди доклад кьыле гьыъыри да1видид тарихаклаа Ка1ълидид му1къу1д мехьтебед историк Шейхэмир Эмиргамзаева.
Гьадыла хъуъ миди да1видид ветеранашды та1рифбыр гьаъара гьабишды йигитва1лид ва эркеква1лид, шууна ес ватан немецкий фашистешдаа азад выъырди, далгыри мисед юлдашер:
— СП «Амсарский» — кьухьды Суракат Курбанов;
— МР «Рутульский район»-дид кьухьнийды уполномоченный Шафи Абдуллаев.
— К1аълидед мехьтебед директор Курбан Эмиргамзаев;
— К1аълидед мехьтебед кьухьды ма1гьа1лим Джалал Гасанов;
— Амцурдыды мехьтебед директор Фикрет Рамазанов;
Къинед мехьтебед директор Сакит Абдуллаев;
— СП «село Кина» — кьухьды Тельман Джумаев;
— пограничный «Рутул» комендатурадид къуллухчиер ва маддыбыр.
(Миди ми выъыд лап йыхды гвалахад суруу — ц1инды памятник лихьинид ва гьади куьмег гьыъыд инсанашикла е мирдже кихьиси).
Гьади К1аълидед мехьтебед ма1гьа1лимеше ва хынымеше выъыр гьа1зыр, гьувга выъыр ай лап уфтанды, байрамас таликьды программа. Шейхэмир магьа1лимере кьыле гьаъара сасад уфтанды, да1видид тарихаклады баятибыр, гьанийды джыбра мехьтебед телебийше гъади гьыъыри кьыле йигитва1лис ва азадва1лис кихьир ад дур-ун ад шаирешды ч1елбыр.
Рышбишды коллективере миди гьувга выъыр ай уфтанды мук1 «Дурна»-хьур («Журавли») дур гъад. Гьади джама1хтис лап бегемиш вишир ай театрад калды сцена «Эскеред нинис кагъат»-хьур (Письмо солдата матери) ва мадды мисед 9 Маед йыгъад байрамас лейихды гьа1зырвалдыбыр.
Амцурдыды хынымешды мук1быр гьаъад коллектив ки йибкьыр ай, джуьхьды мук1мыхьван, К1аълидебишды джама1хтис ми ц1инды памятник ва 9-Маед йыгъад байрам къутли ваъара. К1аълидед му1къа1, 73-ыд сен бегьем йишидаа хъуъ да1ви лап1т1ур, гьамыъ сихьир а да1види дыхьыр, ватан увуху1д йигитешды ц1ырымыд хатиресды памятник. Гьадид гъилы-кьулу гъанидиъий амцурыйшды сельсовет Суракат Курбанов ва К1аълидед мехьтебед директор Курбан Эмиргамзаев, джуьхьды коллективбыр ва джамагьа1тбыр сыт1а гьыъыр.
Е ки ми лап йыхды выъыр ад гвалахад ва Ватандид кьухьды да1види гьалибдишидид йыгъ сиене К1аълидид джама1хтис къутли гьаъара — шад диший ва1 сиенебыр ва сагъ диший, хала-хала бахт-берекет виший, дуьнйа эсла1гь виший.
Къинады Саид
