Къав гьудкьур хараб йишири,
Хьылешис гьа1заб вишири,
Дылан, араб лешур хыле,
Йидзнымыд джубра дишири,
Гьасад вахтбыр хъу1магъу1й

Бийзат Рамазанова

Гьуч1удхьусды май джама1хтид кьухьды Байрамад йыгъ йиъи. Ха1р сыда гьа йыгъа артухана агъмиш даъара да1вие дыхьыд, да1вия хъидкьыд ихьды йигитер. Йик1иы хъыдгара да1вие дыркьыр хъиджит1кьыд эскерер. Экед сагъул рухьура гьа вахтиндиды замха1ткешешде.Да1виед джетинды вахт гьувгуд шийидер йыгъ йыгъала ц1ам адыргара а. Ама ала лаъ диъид джигьилешис, хынымешис ки гьац1ара гьыъыр йигад йиъи шууды гьазабдыхьван, гуджехьван, зулумахьван лювшуд виъиди гьа1либвал душманаши. Гьабише дуьнйады эсля1гьвалды увуху1р, маа да1ви садаки беслемиш джывыъын бадана. Кьа1сды дидабашды йигитва1лид, ва кьа1сды нинабашды замгьитдид гьунарбыр йик1иыла утха джыъын бадана.
Ахмедова Хури Муталимовнад гьу1мирды ки да1виед юкьды мык1 сеч1ибхьыд виъи. Да1ви кувч1уйне, гьад са кьадардид рыш риъий. Гьанийды рухуд сен йиъи 1930-хьусды. За джуда хайиш гьыъыри: «Вас йик1иы гъамадад гьа вахтиндид ихтилатбыр гьаъ, нин джан».
Хури ришида, гьа вахтбыр йик1иы йыгыйне, нагъвбыр хакьас джишир ай: «Йийц1ырала ки артухды сенбыр литхьур анахъун ки, наъгъад йыгъ кал йик1иы гъамаба зас гьад вахт,- ихтилат гьаъара ка1рч1ури Хури риши. — Да1ви кувч1усмады, дид джуды джафыдик гьыъыд мал-къара, ч1абалашды хы1б (150 ч1абал) хана сывыма ад йиъий, гъафун-гъара ки йишийне, хизан са бабатана ешемиш виъий, амма ху1киймет дегиш йишийне, дид кулак гьыъыри, ад-адишды малбыр хылаа лешур. Сес ки игъивир сатыри, сак1анма ад ху1рид сук ки кине эгъеп1ири, гьадыхьван сыт1ана да1ви ки беслемиш вишири. Е хала хынымер анидиъий — йукьур риши не са шу. Шу ки да1вие гьархы1ри…
Га1шды сыдырма бала га1ш йибкьыри, хьывахда ул высды ка диъий. Усбыр выр, къаргъадалыед к1ашбыр, ари сукбыр ки кидишды, лешур, гьабыр ру1ху1р лиъир ай, лысырды ка1шир выъыр, ама г1а1лихда вихис вуруъурдиший, йик1 мыкьа руъурай. Уу лаъасды валыг адиший, сукана кьы1нне ки, гъы1нне ки са кар гъай, сур йишир, тикетке йишир, к1ук1ал гихъивхьисды парче аргардиший. Нин, чара джившир, хынымер бадана, дидда джура ришири, хынымер га1шды дыкьыркьас хьур. Малбыр хъыъыр са бабат, га1ш сыла вишири, амма хьыв адиший… Балад илсанар мыха1 га1шды «хьыв, хьыв» рухьура дыркьыри. Гьадыла кьухьды-ка1сды илсанашис хьывад са хы1ль саъ сивийне, эккене хъа1л лювгъу1ре… Гьамыъды замана, валлагь, дженеткал гьувгара, гьа вахтиндид залымва1лихда гадкъы1йне.
Балад гьа1забыр диъири джама1хтире: эскереше джуьхьды джан кьурбан гьыъыри гьалиб дишин бадана. Хьылеше, хынымеше ва кьа1сдыбише хыва1 лювшур ваъара ай юкьды гвалах, шуунакиъиди чалыш диъий балад хайир лешур, ха1рдыкла да1виед фронта ад эскерешис балад пай сивыгас хьур. Илсанаше диъири эккед замгьа1тбыр: бер йыхы1р багъбыр ки езерей, хуюмы дыхьыр ешбыр ки гьаъарай, мыграа саъна шалыдыхьван укьуд бар хъивихирей. Са т1екьийкьеды а сыкьы1сды маджал адиший, колхозад малмыд нехирбыр уху1с дуруъурай».
Генеки да1виере лихьид йик1иы ярамыд, йишид зиян-зарармыд, джама1хтире диъид гьа1забырмыд ва пыч йишид джигьилешды гьу1мирмыд, да1вие гьатхы1д духрешды нинабаше сыъыд на1гъвмыд ихтилатбыр гьыъыри гьание.
Ихтилат ахирес ки Хури ришире Аллагьахьде дилег гьыъыри, илсанашис ва ала лаъ диъина ад хынымешис, ма мидыла хъуъ дави мысна ки гьувгус къисмат мыъый хьур, ду1нйа ки эсла1х виший хьур.
Да1ви лапт1уда хъуъ ки Хури риши балад сыдырма колхоза дояркавалдыбыр гьаъара марай, колхозад седрийше тапширмиш гьыъыд мадды гвалахбыр ки кьуле гыргарай гьание. Хури ришид дур кьухьдыбише йыхана гвалах ваъара хьур кьыле гьаъарай.
Медаль «Ветеран труда» ва юбилейный медальбыр выр анийиъи гьанийис.
Гьадухъунды джетинвалдыбыр, гуджбыр гьагур ки, Хури ришид хьесым ч1ийине йиъиине гьабгуд диш, ха1ммише джанахьван-гьа1зизахьван лалгара илсындихьван рыкъа1 гырхы1йне.
9-маед байрам вас къутли ваъара газетед редакцияди гвалах ваъадбише, ху1рметли Хури риши!

Зарема ИСРАФИЛОВА