22 мартас Лучек мукъа1 йыгыр ай Эред галды йыгъас таликьды гвалахбыр. 21 мартад на1хен мукъу1д йы1кьа1 ад майдана лик1ва гыъыр ай Эред ц1ай. Гьади сыт1а дишир ай мукъа1 ад сиени хынимер, кьа1сды-кьухьдыбыр, джегьилер ва маддыбыр.22 мартас мукъу1д Дом культурадид ма1гьлиди сыт1а дишир, гьыъыр ата-бабыйешды гьа1датмыд майдан. Гьади йит1кьыр ай сиени мукъа1 ад илсанар ва гьади гьа1р са халаа йит1кьыр ай Эред галды йыгъасды садакьадид хунче.
Миди садакьабыр пай гьаъади, далгыр ай, Эред галды йыгъбыр къутли гьаъара, Лучек мукъу1д сельсовет Сафар Сафаров ва гьа1р са мукъу1д ма1гьлидады агъсахъалар.
Гьабыр далгыр ай ми йиъид ц1инды сыдыд арыди шыв гьа1датбыр-нубатбыр айди ва джамагьа1тдид сыдкьинид-люздинид гьадатмыкла ки.
Гьадыла хъуъ миди сыт1а вышид халкьдис гьагва гьыъыр ай лап уфтанды байрамад концерт.
Гьади Лучекды Дом культурадид къуллухчийше гьагва гьыъыр ай мисед концертед номербыр:
— Эрад майдана, аа-уу гыъыр халиче – хаймабыр, лихьир хьуъна гьади гьейегбыр, улед-рагъа1дбыр гьаъара, генеки самыварад хьум ки ийир гьади, кыхы1р ай на1ни-макьамбыр;
— гьади хьуънабый сихьир ай куьгьнед хала-лаха ишлег гьаъад къабыр, багъди-быстана йихед лазимды а1гьтаджбыр;
— миди гьагва гыъыр ай Дом культурадид художественный самодеятельностере гьазыр гьыъыд мук1быр «Дурна», «Акушинка» са ки «Лезгинка», уфтанды уу валыг ки лыъыр;
— Эред майдана йа1хъбыр балана гьаъара, гьагва гьыъыр ай к1аъды театральный сценабыр — «илчива1лид гьа1дат», «кьву1нды дустад хъа1л» ва «сылабырмыд духтур». Гьамыд натиджа виъий сасад ч1ирине руъуд гвалахмы йа1хъ сагъун;
— лап уфтанна йишир ай номер концертед «Рыш былахадаа дагул рыъыри»-хьур, гьили на1нидид ундихьван мук1 ваъад рыш дагул раъара лышанчиере.
Лучекды Дом культурадид директор Зарема Майсаровара мидыла хъуъ балагемаъ гьыъыр ай Эред майдана на1нибыр мыха1д ва мадды ч1илмыла.
Гьади Эред майдана гьыъыр ай иштрак мисед дур-ун кьавалаше: Ревшан Улилеева, Рашид Айвазова ва Залбег Юсуфова, гьабишихьван кине райондид телевидениедид кьухьды Насир Юсуфова. Гьадыла Зарема Майсаровара ваъара ми юлдашешис эккед сагъул Эред байрам кьуле гыргас джус кюмег выри хьур.
Йиъине ки, ми Эред майдан Лучек мукъа1 лап уфтанна йыгыр ай. Гьабишихьван сыт1а, гене ки джамагьа1тдис гьаъара хьадид байрамбыр е ки къутли!

Къинады Саид