Ха1р халкьдыхда Аллагьара джуду пайгъампарар сидыгыр ад йиъи. Кьва1д гьагъзыр сен мидыла хьури гине дуьнйады яратмиш гьыъыр ай Иса пайгъампар а.с. Юкьды китабакла Аллагьара ха1ла саъ сигыд, Иса пайгъампарас выр ад йиъий сабыйды китаб, «Инджиль» хьур дур гъад. Гъанийс выр ай лап эккед дараджий. Гьанийды хылыкла вуруъурай дарман, хъуджугъу1д эзермыс, ядлымыс, ва мадды-мадды караматбыр – гъаламатбыр гъагва гъаъарай гьание илсанашис.
Хъуъдире-хъуъ пайгъампарахда дишир ай шумур иди Асха1биер. Са йыгъа Иса пайгъампар ва джуду гъац1ардиш йиц1ыр- ц1ыкъва1р диъиме асха1биер, сафар ваъас хьур мадды валаетды, адгъу1ре рыкъа1. Диъи- диъи, са мамзила лет1кьыйне, мибишис руъура га1ше. Ха1рние хадкалды кепекбыр ягъмиш гьыъыр выри сабыйнийде: «Рых, — рухьура, — аъ шегьерди гьемимыс сидхьуд хьывбыр лешур хъикьа». Гъархыри гьемибишикла сабыйды хьывахда. Йыхьыд, хад тангымык гьеминийис сипхьури хьиб хьыв. Хъиъид рыкъа1 гьеминие фикир ваъара: «Хьибды хьывада йиц1ыр-ц1ыкьва1р выг1ылды эдемиер тух дич1ет1име, гьадыхъаъ сабыйды хьыв рыкъа1 за зас вуъулеси, гьабишде гъухьуси:-«сипхьуд гьеми ква1б виъи хьур, изды ухьун гьадад тух викиси». Гьада лу1въури гьеминие гьеми хьыв. Хъыхьыр тимбишде хъывыри кьва1б хьыв. Са г1ал ха1рнийис ситхьуд лу1ъур гьемибыр а1хъа1дч1ури рыкъа1. Са арыдылакал Иса пайгъампарара хьывахда йыхьыдбыйды гадиеда хулкара: «Сабыйды хьыв гьили гьапхыри?» Ми гадиере джываб выри: «Хад тангымыд сибхьуд гьа ква1б х1ыв виъий». «Гьекъийкъат гьаса йиъиме?» хулкара Иса пайгъампарара гьеминийда. «Ий гьекъийкъат гьаса йиъи», хьур гагъу1рдиш ми. Маа диъи-диъи гьемибыр, ыхьа1кал ледкьыри деринды нац1урды къирхыда, ми суруула ул ливийне ти сур гьаджагвад. Хьуъ хъидирхьас йикисне диш. Гьемибыр гедгыри гьемиди, ама Иса пайгъампар хьидыла ула хьуъ йирхьара гьаархы1ри, асха1бийшде ки «дыкьа джубра», хьур сес выъыри. Мибыр ки хьидид ула хьуъ, гьухьус гьеми накьвудыла хьуъ йиъид кал дирхьара хьидид ти суру а1гъа1ч1ури. Гьади ил ыхы1с хьур а сыкьы1ри. Гьади, хьывахда сигыд гадиеда маа хулкара Иса пайгъампарара: «Сабыйды хьыв гьили выъыри?». Ти гадиес Иса пайгъампарара хьидид у суруула хьуъ дыгыр, карамат гьагва гьыъыдыла хъуъ, джуда йишид хатыдид бадана рыхъ руъура, амма гьеми ма гагъу1рдиш, луьвъури хьур: «Валлагъ, гьа ква1б хьыв виъи сипхьуд», хьур, ма мыхьчебыр гьаъара гьеминие. Яхчи хьур, салтара Иса пайгъампарара гьеми гада. Гьемиди гьемибише гъы1рч выъыр, са тур йывхыр, ц1ыы у кабабыр йиджир, сыкьы1р луьвъури гьеми тур. Темизды кьырыбыр на хъаджид къыдыкь йиъий гимадад а. Дугьа1 гьыъыр, Иса пайгъампарара гьагвара-гьагвара сиене асха1бийшис, гьеми туру у як лихъихьири, джан хъидкьыри, лаъ лухъувзур джуду гъилабахьван хъавахара хъа1бхы1ри. Магьа1т1ал дишир, гьаламат йишир гедгыри гьемибыр гьади. Ыхьа1хдакал Иса пайгъампарара хьывахда сигыд гадиеда маа хулкара: «Гьили выъыри ва хьибхьусды хьыв?» Гьеминийис мааки ры1хъ руъура, амма генеки джу лу1въури хьур хы1ва1 харкьардиш, кьин-кьиямат гьаъара: «Сипхьуд гьа кьва1б виъий», хьур. Гьадады Иса пайгъампарара а гид накьвудид хьиб гут1 ягъмиш ваъара. Хьывахда йыхьыд гадиеде рухьура: рых гьети сабыйды накьвудид гут1а сукьа. Сукьуд гьеми а, гьад накьвудид хьибды гут1акла вуруъура къизилмыд хьиб гут1. «Гьеми са гут1 къизилмыд выды виъи, тимбыйды кьва1б ки хьибхьусды хьыв ливъинийды виъи», — рухьура Иса пайгъампарара гьа гадиеде. «Зы йиъи, гьад хьибхьусды хьыв лу1въуд», — къизилма ул ана, гьайвыр хыва1 хакьыри гьеминие. «Иди гьеми къизилбыр ки вас йиъи, амма ехьван сафар хъаваъас йикисдиш вада», хьур сатыри гьеми гада миди. Ти ки шад йишир, девлетлы йишир а хьур, сукьури гьа къизилмы макъыет йикис, хала хъихиси хьур. Ыхьа1кал гакъыд, хыле са чивал-чантый, шывга ки хадиш. Гьемисе гергыр а, къизилмыд къарывыл йишир. Гьадады гьеминийы ха1сил дуруъура дамыр ма ад, дагулды-сырыхды гъад, хъачахвалдыбыр гьаъара ешемишды хьибыр люти эдеми. Гьеми текды йиъи, гьада гьуджум выъыр, йыхы1р йикье гьыъыри гьеми хьибние гьа гада. «Ева1 хьибыр а, хьиб къизилмыд гут1 ки ги, ха1рнийис са-са гут1 пай ваъаси», хьур, меслагьа1т ды йит1кьыри гьемибыр. Гадкъы1д хыле чантыйбыр хадиш, га1ше ки йиъи. Сабыйды джва1ршикла сиргара гьемибише хьыв, улед-рагъад, хьибнийис хьибыд чантый ки лешур хъикьа, рухьура. Къизилмыкла сагьа1лды быр ки хыле вылц1ара. Гьеми руъура хьывахда, йиъид джигыди фикир ваъара: «Гьабышис зы йыхы1р, изды пай къизилмыд джва1ршис ваъас йигара йикиси, гьадыхъаъ за лешуд улесдыдик гьабишис агъу каъаси. Гьабыр ки дыкьыркьаси, къизилбыр ки сиене зас йикиси». Тини мадад кьвуние ки меслагьа1т гьаъара: «За на, ва гьад хъиркьыйне йыхы1си, гьанийды пай ки ес ваъаси». Гьада гьеми хьыв хана хъиркьыд эдеми гьемибише хъиркьыдкал йыхы1р йикье гьыъыри, джва1р ки агъу кид хьыв лу1ъур ква1рси дыркьыри.
Гьадийкьама Иса пайгъампар ва джуду асха1быер, сафар бегьем вишир, хъуьдуьргъуьр хъит1ина ай. Рыкъа1 гьемибишис гьахъагури къизилмыд хьиб гут1 гимабай, секкинийис йукьнийикла джишир.
Гьадыла Иса пайгъампарара гьухьури: «Артухды девлиди ул садаки имирвихь, гьады маннийды ки мысга ул гъад виъи».
ЗАРЕМА ИСРАФИЛОВА
