8 февралес Мыха1д райондид администрациедид кьухьные выгыр ай иджлас РФ-дид Президент керъэсды сечкимыс суалмыс гюре.
Гьа выгыр ай МР «Рутульский район»-дид Кьухьды Ибрагим Ибрагимова.Гьади иджласа иштрак гьыъыр ай райондид Ерли сечкимыд комиссиедид седри (ТИК) Ибрагим Ибрагимова, райондид депутаташды Маджлисед Седри Артур Таирова, райондид Джама1хьтид палатадид Седриед заместитель Шафи Абдуллаева, райондид администрациедид идарамыд къуллухчийше ва районди ад му1къмыд сельсоветеше.
Миди хьуъ гет1ир ай сахьусды таликьды суал — РФ-дид Президент керъэсды сечкибыр, закондид арыма ягъа1д кал, саабырахьван ва темизене, гьа1р са илсанас гьа1р са сечкибыр гыргад участока сиене условиебыр гьыъын бадана.
Сахьусды гафахьван гьалгыри райондид Кьухьды Ибрагим Ибрагимов. Гьание хайиш гьыъыри миди ад сиене кьухьдыбишда, йиъид кал, дюзгуьнне гыргаъ хьур сечкибыр джуьхьды участокма.
Хьели миди иджласа далгыри:
— Ибрагим Ибрагимов, райондид ТИК-ед Седри. Гьание хайиш гьыъыр, дюз-дюзгин гьаъ хьур ягъа1д кал избирателешды сийагьбыр ва мадды лазимды документация, бюллетенбыр ийисды кьутибыр (ящики для голосования) — участока силхьед ва гьадаа гъаъ йихибыр, сес ивисды кабинабыр, информационный стендбыр ва мадды илсанашис кюмег вылц1ад карбыр.
Гьади гене ки миние хъухьури — сечкибыр гыргад участокма принтербыр йишир йыгара лицензие ад джиды номер хъуд картриджмыхьван, мобильный связь вишир йыгара сиене му1къма ва сечкибыр гыргад участокма ва маддыбыр.
Гьанийила хъуъ ми РФ-дид Президентед сечкимыс таликьне иджласа далгыри райондид администрациедид къуллухчиер, мадды миди ад кьухьдыбыр, му1къмыд сельсоветер.
Ми юлдашер далгыр бегьем дишидаа хъуъ, иджласад итог гыргара, гене ки хъалгыри МР «Рутульский район»-дид Кьухьды Ибрагим Ибрагимов. Гьание гьухьури: «Е-ва1 диъи бырджли РФ-дид Президент керъэд сечкибыр лап темизене, элды уровена гъана йыгын. Ихьды бырдж йиъи гьа1р са му1къа ад илсанас условиебыр гьа1зыр гьыъын, джуьхьды закондире джус выд ихтияр сес высды арыди йыгын бадана; гьади сиени сес вылц1ад участокма сиене условиебыр, агьтиетвалдыбыр закондире ягъа1д кал, джиды вахтинди гьазыр йишир йигара».
Ибрагим Гусейновиче гене ки хъухьури, гьа1р му1къмыд поселениема гвалах ваъара дишир йыгара, сыт1а гьыъыр рабочий группабыр; гьаммык кине дишир йигара ху1киметед идарамыд кьухьдыбыр.
Гьадыла хъуъ гени ки миди кьухьдыбыр далгыри мадды ки райондид яшайишес лазимды суалмыкла.
Гьадыхьван иджласад гвалах лап1т1ури.
Къинады САИД
