Райондид кьухьды хаIсил йишир ай кIаIълидебишихьван

SAMSUNG CAMERA PICTURES

4 июлес Мыха1д райондид кьухьды ха1сил йишир ай к1а1ълидед джама1хдихьван. Гьади гьанийихьван анидиъий идарамыд кьухьдыбыр, джуду заместитель ва мадды сес выъыр ад юлдашер.
К1а1ълидед мехьтебе сахьусды гафахьван ха1силвалдыбыр ачых гьыъыри Амсар сельсоветед кьухьды Суракат Курбанова.
Гьание сыт1а дишибишис салам сувгъудыла хъуъ, ч1ел выри райондид кьухьды Ибрагимов Ибрагим Гусейновичес.
Гьание мисе гьухьури: «Ху1рметли К1аълидед джамаха1т, зы кьухьды йишир мадана, за выр ай ч1ел ха1р сур сыдыд арыди зы ха1сил йикис хьур сиене ихьды районди ад му1къмыд джама1хдыхьван. Ха1р му1къа1 йыхьыр гьац1ара гьаъас, шыв сахьусды лазим йиъиди ва мидыла хъуъ шыв къайгъу ваъасди.
Ва1, гьалылана ры1хъ, ха1я джыъыр, гьаъ гьемиди джама1хтид улихьде ихтилат шыв, четинвалдыбыр вес ади, гьилды кьухьнийыла инджикли диъиди, гьилды идаради ва1с убур джырахы1ди ва шыв къайгъубыр ади. Ва1 сиене суалбыр зас вияъ, хьели е гьамыс дживабыр хъывыси».

SAMSUNG CAMERA PICTURES

Сахьусды суал выри Ш. Эмиргамзаева, хьед адиш ихьды мукъа1 гъийкьыд хьур, У. Эмиргамзаевара гьыъыри ихтилат К1аълидед гъы1 гъадишды периламыкла, заргъана гьада хьуъ йилгад машинмыкла, лубкура ад телирды усмыкла. Д. Гасанова хуткур, гьис ихтияр ади йик1ис йыхы1д йыхьыр му1къу1д йокбыр сатхъа1 гьаъас. Л. Меджидова лаъ гет1ир накьумыд суал. Генеки гьади далгыр ай М. Бабаева, Н. Минафова, А. Омарова, Ш. Селимов ва мадды юлдашер, гьабише ки хьуъ гет1ир ай суалбыр адишды гволахад, выше кучима адишды йоква1д, валхвара ад клубад ва мехьтебед.
Гьа сиене суалмыс джывабыр выри джуьхьды сельсовет Суракат Курбанова, образованиедид кьухьды Рамазан Афраимова, тукмыд старший мастер Тофик Ибрагимова, экономикадид специалист Салам Магомедрагимова, пенсионный фондад кьухьды, районный депутат Феликс Рамазанова, главврачед заместитель Равиль Ибрагимова, МФЦ-дид кьухьды Сулейман Сулейманова, ры1къмыд кьухьды Шафи Абдулаева ва УСХ-дид специалист Самидин Мацаева.
Киджубра райондид кьухьние гьухьури: «Вы1хьды сиене выдыхъунды суалбыр за кьуле гыргас чалыш йикис. Гьеми вазырды арыди хьидид суал кьул-джубурна бегьем гьаъас. Вы1хьды депутат Феликс Рамазановад кюмегдыхьван гьаъаси выхьды кучима йок. Тофик Ибрагимовда за гьухьур а телирды лубкура ад усбыр дюз хъаъ хьур. Яваш-явашне евеше хыл-хыле выр — кьухьдыбише ки, джама1хтире ки — му1къу1д улихьде гид суалбыр кьуле гыргаси. Зы чалыш йикиси джама1хтис раха1т гьаъас йыгъ-йыгъала яшайиш йыха йишин бадана».

Насир Ибрагимов,
Мира Казиева.