ДжамаIхтид къайгъу-дердибыр агъмиш гьыъыр ай

Безымянный

21 хьусды июнас райондид кьухьды Ибрагимов Ибрагим Гусейнович ва мадды райондид идарамыд кьухьдыбыр ки хъуна йыхьыр ай йукьды мукъа1, джама1хтихьван ха1сил дикис хьур.
Сахьусды дыхьыр ай гьабыр Джилихура, гьади ад илсанашды суалмыхда хъадацус хьур.
Ягъмишдишибишис салам сувгъудыла хьуъ, Ибрагим Гусейновиче хайиш гьыъыри халкьдида, джуьхьды яшайишед ва мукъу1с камды-кесды, лазимды кармыд ихтилат гьаъ хьур. Илсанаше ухьури:
Безымянный111

– Сахьусды сельский клуб к1алба хъывгыр йигара хьур, ра1хъбыр гийтхьур а, гьамыс ремонт йигара хьур, тукахда напряжение гъийкьыд адиш хьур.
Ха1р са суалас кьухьнийхьван йидкьыр ад специалистеше лазим йиъид кал джываб хъывыр. Гьадыла хъуъ Ибрагим Гусейновиче джама1хтис ч1ел выри, джуда руъуд гвалахбыр кьуле гыргас хьур.
Джилихура выгыд иджласала хъуъ райондид кьухьды ва райондид идарамыд кьухьдыбыр дыхьыри Ц1удик мукъа1, гьади ад халкьдид суалбыр гьац1ара гьаъас хьур. Ц1удик мукъу1хда суалбыр йишири бала гуджлидбыр.
21 хьусды веке Ц1удик му1къа1 адиш дюзгюнды сотовый связь, му1къу1хда адиш ФАП, духтурашихда едебыр кьабыл даъас йикисды идара адиш. Мехьтебед автобус йип1кьыд йыгъала куъ са йыгъа ки хынымер бадана ишлемиш ваъас йишир адиш. Мехьтебед телебиер са гьили га дуруъусды лазим-герек йишийне, джетинне ва диды-нинды кюмгихьван маджбыр дуруъура дуруъус.
Безымянный11

Са ки джама1хтире эккене хайиш гьаъара ай райондид кьухьнийда ва Шафи Кафлановичда суфтед ху1киметди ад бермыд система гъилы лихъивин бадана.
Ми му1къа1 ки гъийкьыд напряжение адиш, клубад усул ки сагьа1л к1алба хъывга хьур хайиш гьыъыри халкьдире.
Ха1р са суалас идарамыд кьухьдыбише джываб выда хъуъ, райондид кьухьды Ибрагим Гусейновиче хы1ва1 лешур спортивный мехьтебед не хынымешды садикед гвалах гъилы лихъивис хьур.
Ц1удикди встреча лат1уда хъуъ эккед джама1хтид разива1лихьван рыкъа1 эхъедири йит1кьыд кьухьдыбыр.
Гьадыла хъуъ гьабыр хъытхьыри Лучек. Гьади ки гьасад встреча йыгыри. Сахьусды гьалгыри райондид кьухьды Ибрагим Гусейнович. Джама1хды салам сувгъудыла хъуъ, гьание гьухьури: «Е гъийгъа йидкьыр а миди ва1хде, шыв джетинвалды, лазимды ва камды-кесды ади хьур хуткас. Выхьди суалмыс джывабыр выс. Яла асыллы, кьуле гыргас йикисды гвалахбыр шыв ади гьац1ара гьаъас хьур».
Безымянный112

Халкьдид суалбыр йишири хьуланды. Сахьусды Лучекдид не Джилихурад арыди са1ргъа1т гьилды виъиди хьур гьац1ыр йигара йишир.
Колхозма джалахьуъ гвалахбыр гьыъыд илсанашды пенсиебыр лап ала йиъи хьур. Дамаа кьы1дис усуд мызар ваъас ихтияр вылц1ардиш, маса лешусдымыс ки эккед кьиймет высды хыле танга хадиш хьур.
Амма Лучек са йыхды гвалах ки ани виъи. ФАПад кьухьды Шахбанова Рена Маллаевнара сагъулбыр гьыъыри райондид ЦРБ-дид главврачес Алиев Идрис Шахбановичес, сиене лазимды выр анийиъи хьур ФАПад идарадис.
Ахирески иджлас хъывгыри Амсар му1къа1 ад джама1хтихьван.
Гьади ад илсанаше сахьусды хайиш гьыъыри кьухьдыбишда хьедбыр ма1хкамна, саламатана гыргаъ хьур. Я рагъад, я ки гьабгъуд хьед гъийкьара адиш.
Хьеликана гет1ир ай хьуъ ры1къмыд суал, ра1хъбыр усла-к1алба хъыгын бадана.
Джуды суруула Ибрагаим Гусейновиче хыва1 лешури: сахьусды Рутул- Лучек рыкъы1д участока асфальт аъас хьур. Кьва1дхусды ки мехьтебес ремонт гьаъас хьур, хынимер лейихды мехьтебе дыхьыр йигад йиъи хьур…
Вагиф Меджидов,
Зарема Исрафилова.