Амсар мукъаI цIине хъыъыр а Кьухьды, Ватандид ДаIгьвиди дыркьыдбишды дурухда сихьир ад обелиск.
Мисде, 7 хьусды майед йыгъа, Амсар мукъаI кьула йыгыр ай эккед галды йыгъ. Гьад виъий, Кьухьды Ватандид ДаIгьвиди, Совет халкь гъалиб вишид, 9 майед йыгъас уйгъунды байрам. Ми байрам, мисдед сыда, Амсар мукъаI, кьваIд йыгъ хьура гине выгыныхда эккед натыдже ай. Гьади цIине хъыъыр ай Кьухьды Ватандид ДаIгьвиди дыркьыдбишды дурухда сихьир ад обелиск. Байрамаик, райондид администрациедид кьухьды Ибрагимов Ибрагим Гусейновичехьван кине йидкьыр ай мадды идарамыд къуллухчиер, муIкъмыд сельсоветмыд кьухьдыбыр, шегьерма гвалахбыр гьаъад мукъуIд гьамбазар.
Дур джикьисды (бессмертный) полк йибкьыдыла хъуъ, обелискады венок ва бычIбыр лихьидыла хъуъ, Амсар мукъуIд сельсоветед администрациедид кьухьды Курбанов Сураката ачых гьаъара галды йыгъ, хьаIли гьание гаф вылцIара райондид кьухьнийде. Ибрагим Гусейновиче ва йидкьыд-хъидкьыд мигьманаше, Амсар мукъуIд мехьтебед директор Рустамов Мехти Казиевиче, за ки, авторара гьеми хабармыд, ва маддыбише тебрик ваъара Амсар мукъуIд джамахаIт, Совет халкьдид ГъаалибваIлид Йыгъахьван ва гьад йыгъас уйгъун на цIине хъыъыр ад, даIгьвиди каатхыIдбишды дурухда сихьир ад обелискадихьван.
Торжестводид гьиссе латIудыла хъуъ, мукъуIд медениетдид ва мехьтебед коллективмыра гьагва гьаъара эккед
Галды йыгъад концерт, гьадыла хъуъ ки халкьдире гьаъара мукIбыр.
Гьамыъ ки зас, са кьваIб чIел гьухьус йыгара, обелиск цIине хъыъыр, абырди хъыгыд инсанашикла.
Гьатхыд, нур вылцIад, мраморад плитамыхьван рытIа хъыъыр ад обелиск цIине хъыъыд инсан, гьаман Амсар мукъуIд инсан йиъи. Амсар мукъуIд ватандаш — Магомедов Джамалидин Шахбанович, ешемиш руъуд йиъи Дагъыстандид меркезе — Махачкалади. Гьад йиъи, Каспийск шегьерди ишлег ваъад, «Грин – груп» рухьуд стройкомпаниедид кьухьды инженер. Гьание, выдж гьухуд мукъаI сихьир ад Обелискадид вазифа гьувгуйне, мукъуIд сельсоветед администрациеди сивхьири бала лейихды мыслахаIт – яни абырди хъыгын даIгьвиди дыркьыдбишды дурухда сихьир ад, джуды мукъаI кIыблаа хъуъ ад Обелиск.
Джамалидин Шахбановиче, джуды сурула, джуды халкьдис садакьа кал, джуды харджидихьван мукъаI хъидкьыр а лазимды кьадар: мраморад плитабыр, джиле аъад плитабыр, ва мадды-мадды материалбыр. УстарваIлид гвалахбыр кьула йыгыр а Амсар мукъуIд сельсоветед администрациедид кьухьнийды заместитель Ибрагимов Устархана, Раджабов Фиридине, са ки Керимов Артура. Гьабишис куьмгис дуруъура дишир а: Магомедов Нарман, Шахбанов Фазил, Гусейнов Бахтияр, Сердеров Артур, са ки амцурдабишды, Лучек мукъаIды язна Сердеров Сердер.
Обелиск гъад майданад гыргады, а у, кыхыIр а ухьтанды фонарьбыр, гьабыр йидкьыр ай джуды суруула, мукъуIд гьамбазара, таможнядид майор, Сердеров Муслим Гаджиевиче. Гьание, гене, джуды харджидихьван хъикьасды йиъи сиене площадкади аъасды плитабыр.
Са чIилихьван, 7 хьусды майед йыгъа, Амсар мукъаI, ихьды халкьдид Кьухьды Ватандид ДаIгьвиди Гъаалиб дишинид галды йыгъ бала йыхана, рангаа-ранг, бала гуджлине арыди, джигиди йидкьыри, чунки гьад мукъуIхда Джамалидин Шахбанович ва Муслим Гаджиевич каалды духре а хьур! Сагъ дишихь, къуватлы дишихь, хушбахт дишихь гьабыр ва гьабыр каалды, мадды, джуды, вухуд муIкъ йикIиы гъад, Амсар мукъуIд духре!
Шафи Амсари
