Рыхьы1двешдухъунды дагъыстанабише 29 майес хъывыр ай сахьусды основной периодад единый экзамен, РД-над гьы1лимдид ва кьылевыъынмыд министрествадид пресс-службадид хабардыхьван.
РД-над гьы1лимдид ва кьылевыъынмыд министр Шахабас Шахова ихтилат гьыъыри, са нагьакьвалды кидишне йишири экзаменбыр. «Гьа рухьуд ихтилат йиъи, йикисды гвалахмыд кьул-кьулик кине гьазырвалдыбыр йыгыр ай. Министерствади ад къуллухчиер ха1р хылис ха1сил дуруъурай выпускникешыхьван, дидабашихьван-нинабашихьван, организаторашихьван ва халкьдид наблюдателешихьван. Гьабыр шегьерди дуруъуд ка, гьааса Дагъыстанад хырыдад районма ки дуруъурай.
Йик1иы лихъиес, шесды сыда ЕГЭ-быр дюзгюнне кьуле йыгыр хьур Дагъыстан Республикадид Кьухьние ва Рособрнадзорара эккед кьимет выр ай ихьды компаниедис. Мистед сыда ки е чалыш дикиси гьа кьимет саъ джаваъасна. Ихьды сахьусды къайгъу виъи, сиенебишис гьац1ын, Дагъыстанди гыргад ЕГЭ-быр дюзгюнне гьаъад»,- гьухьури ведомствадид кьухьние.
Генеки йик1иы лихъиес, гьа йыгъа Единый ху1кийметед экзамен сиене хынимеше хъывыр ай географиеда, информатикада ва ИКТ-да. Дагъыстанди ры1хьды муниципалитетма ачых гьыъыр ай мыйеб пункт экзаменбыр гыргасды. Сиене пунктма кыхы1р а видеонаблюдениебыр ва металоискательбыр.
Гьамыъ Дагъыстанди (беслемиш вишир) гвалах ваъар а Ситуационный центрадире, шыв а1гьвалатдихьван гыргарди экзаменбыр, макъыет дикисне ва дюзгюнне кьуле гыргасна гьабыр. Гьадыла саваенди, гьадиъ сидигыр ай хьибц1ыр халкьдид наблюдателер.
Экзаменмыд яц1-кац1 гьац1аси 14 июнес. ЕГЭ-мыд минимальный балмыд кьадар информатикада на ИКТ-да мисдед сыда йиъи 40 балл, географиеда хьибыд балл алана ка лешур йигара.
Мира Казиева