Дагъыстанад Кьухьды Рамазан Абдулатиповад Послание агъмиш гьыъыр Рутульский районди

SAMSUNG CAMERA PICTURES

Февралад аахиред йыгъа Рутульский районди депутаташды Иджласа агъмиш гьыъыр ай Дагъыстанад Кьухьние РД-над Халкьдид Иджласас сигыд Послание ва кьабыл гьыъыр депутаташды Иджласас сигыр ад муниципальный райондид кьухьнийды отчет.
Послание агъмиш гьаъади иштрак гьыъыр ай РД-над Халкьдид Маджлисед депутат Давуд Сулейманова, МР «Рутульский район»-дид кьухьды Ибрагим Ибрагимова, райондид Иджласад депутаташе, сельсоветмыд кьухьдыбише, идарамыд кьухьдыбише, диндид, халкьдид представителеше, СМИ-ра.
Иштракчийшды улихьде гьалгади, райондид кьухьние гьухьур, Дагъыстанад Кьухьнийды республикадид Халкьдид Маджлисес сигыр ад Послание — гьа1тхы1д сыдыд гвалахад итог йиъи ва гьагва гьыъын суалбыр, кьуле йыгыр йыгад ц1инды сыда. РД-над Кьухьнийды ми Послание, хьурагиндыбыр кал, эккед документ йиъи, гьагва гьаъад гвалахмыд а1гьвалат республикади ва гьувга ваъад ра1хъ джетинва1ляя а1гъа1ч1усды.

SAMSUNG CAMERA PICTURES

Сахьусды лазимды приоритетбыр на гьагва гьыъыр а безопасность, джат1ур ва хайир кине лаъ выгын Дагъыстан, Республикадид илсанашды правобыр ва свобода увуху1н. Джуду Посланиеди республикадид Кьухьние йыхды кьимет выр выгыргара ад ерлид самоуправлениемыд органмыра шегьерма на районма социально-экономический а1гьвалат йыха вишинис, ва хайиш гьыъыр муниципалитетмыд кьухьдыбишда мааки гуджли ваъ хьур гьа гвалах, гьухьур Ибрагим Ибрагимова.

SAMSUNG CAMERA PICTURES

Гъийгъад йыгъа ад районди а1гьвалата выдж рази диш хьур ва умуд ваъара хьур гьа йыха хъившины мидыла хъуъ.

«Рутульский район — гьала ки балад показателмыд сураа йыхды районмык кидиш республикади. Гьадыла саваенди, е республикади сасад джигима джубра хъунидиъи. Йис гьаса йиъи, себеб шиви? Йис е джаъад республикадид кьухьдыбишды доверие оправдать? Зас гьац1ад, джывабырмыкла гьа суалмыд ес хабар виъи: сиене асыллы йиъи ела, ихьды гвалахала.

SAMSUNG CAMERA PICTURES

Гьадыла гьухьус йыгара, ес йыгара ц1инды подходбыр, ихьды улихьде Республикадид Кьухьнийды Посланиедире сихьир а задачабыр, арыди йыгыр йыгад гвалахахьван. Гьагва гьыъыр а Посланиеди сиене лазимды гвалахбыр 2017 сыда гьыъыр йыгад-илсанашды яшайиш лаъ-хьуъ йыгын — гьа виъи ихьды сахьусды задача, ва е ки бырджли диъи гьа кьуле выгын»,- гьухьур райондид кьухьние.

SAMSUNG CAMERA PICTURES

Халкьдид Маджлисес сигыр ад Дагъыстанад Кьухьнийды Посланиедид бадана ч1ел гьухьур Дагъыстан Республикадид Халкьдид Маджлисед депутат Давуд Сулейманова ки. Гьание гьухьур, Дагъыстанад Кьухние джуды Посланиеди гьухьур ай выгыр йыгара хьур терроризмадыхьван да1ви сиенебише, хыл-хыле выр, ари хана. Илсанашихьван выгыр йыгара кьуле эдесды, дюзды рыкъа1 эч1усды гвалах, сахьусды кьул ният абишихьван экстремистешды сур хакьас йигара, гьабишды бегедебишихьван, дид-нинихьван.

— Сиене халкьдире выгыр йыгара да1ви террорахьван на ва экстремизмадыхьван,- гьухьур Д. Сулейманова.
Сахьусды кьул гуджли выъыр йыгара районди участковый инспекторашды гвалах, ачых гьыъыр участковый пунктбыр.
МР «Рутульский район»-дид депутаташды Иджласа 28 февралес генеки агъмиш гьыъыр ай хьуланды суалбыр:
— «МР «Рутульский район»-дид кьухьнийды отчет (М.Д. Магаррамов);
— «Райондид Контрольно-счетный палатадид отчет» (А.М. Гасанов);
— «МР «Рутульский район»-дид депутаташды Иджласад 1-хьусды полугодиедид 2017 сыдыд гвалахад план» (Р.М. Рамазанов);
— ОМВД России Рутульский райондид кьухьнийды 2016 сыдыд отчет» (А.И. Сурхаев).
Сиене агъмиш гыъыд суалмыд бадана эгъет1ир ай лазимды кьат1ламабыр.
Б. МЫХА1ДЫ