6 февралес Дагъыстанад Кьухьды Рамазан Абдулатипов выступит йишир ха1р сыдыд РД-над Халкьдид Иджласас сиргад Посланиедыхьван, ихтилат гьыъыр ягъмиш дишибишис республикадид агьвалатакла ва сахьусды кьул кьуле йыгыр йыгад ху1киметед политикадид гьакьасабырмыкла.
Республикадид иджласас сигыр ад Дагыстанад Кьухьнийды Посланиедид сиене суалбыр йиъи гьакьды-кьулдыбыр ва ха1р са дагъыстанашурас лазимдыбыр.
Гьухьус йикиси Республикадид Кьухьнийды Послание — властере выгыр йыгад гвалахад программа виъи йиъинаъад сыдысды.
Регионад Кьухьнийды выступлениедис сахьусды комментарие вылц1ади, РД-над Правительствадид Седри Абдусамад Гамидова мисе гьухьур: «Послание — ихьды ми сыдырма йыгыр ад гвалахмыд итогбыр йиъи, 2016 сыдыд гвалахад ки кине. Гьухьус йикиси, е сиене суалбыр кьуле йыгыр ай 100% йыхы1р, таликьды республикадид правительствадис хьурагинды 2015 сыдыд Дагъыстанад Кьухьды Рамазан Абдулатипова гьыъыд Халкьдид Иджласас обращениедик кид. Гьаса е чалыш дикиси ми хылис ки. Баласды суалбыр, гъийгъа агъмиш гыъыр ад, гьамыъмадана киниъи республикадид развитиедид приоритетный проектма. Гьадыла саваенди, кьабыл гьаъас график, кьуле гыргасды выр ад поручениебыр, гьамыд вахт ки ливхьир а ва илсанар ки гьадгва дыъыр а».
Джуды Посланиеди республикадид Кьухьние балад убур йыхы1р а илсанашды къавгъу-дердимыс. Гьадыла гьание хайиш гьыъыр ай ха1рса ерлид кьухьнийда, республикадид йишир, муниципалитетед йишир ки, гюзет гьаъ хьур илсанашды къавгъубыр сахьусды кьул джуьхьды гвалаха. Йишидыхъунды илсанашды бегеде диш хьур, гьабишихьван ачыхна, сыт1а гвалах ваъ хьур ай.
Дуьнйады кризисный гвалахбыр ана йишийне ки, Дагъыстанадид Кьухьды чалыш йиъи республикадид экономикадид мертебе гене ки лаъ ваъас. Ми джыбрады сыдырма Дагъыстандид экономика дирид темпмыхьван лаъ выгыр, гьадид агьвалат промышленностед сураа лап элаакал виъи.
Рамазан Гаджамурадовиче, чалыш йиъине, миди дыгыргара а инвесторар Турцияда, Иранда, Японияда, Азербайджанда ва мадды гьу1киметма, Российский Федерациедид баласты регионмыхьван ц1ине хъыъыр а месла1гьа1тбыр ва экономикадид майдана алвербыр дири хъыъыр а.
Лап деринды фагьам сивхьир а ад джегьилешды яшайишес ки, сиене муниципалитетма сыт1а гьыъыр а джегьилешды парламентбыр, талант ад хынимер ва джегьилер хьуъ геет1ир, гьабишис куьмегбыр вылц1ара, гене ки ра1хъ ачых ваъара.
Республикадид арыди лап хылаа сивигыр ад сифтед ч1ы1х-руг гъад усул, гьадид четинды месъэлебыр халкьдис йыгад кал к1алба-усла хъыгара а.
Ми сыдырма лап дюзгин хъывыъыр а налоговый базадид агьвалат ки — гьу1киметед закондид кьарармыра йа1гъа1д кал республикади балад дагулане алвер ваъад ва мадды гьасад инсанар ачута эдир а.
Налогбыр гьу1киметед хазныди бала кал йишийне, ц1инды объектбыр ки халкьдид яшайишес лазимды балана сихьис руъура.
Дирибашды темпмыхьван арыди виъине а агропромышленный комплекс ки. Сиене республикади кыхъы1хы1р а т1ымлад, ичирды ва мадды багъбыр, тепличный хозяйствабыр йыгъ-йыгъаала балана сильхьере а, республикадид сельхозпродукцие балад россиядид регионма йихире а, маса вылц1ара.
Илсанашды, джама1хтид безопасностес ки ми сыдырма балана ва йыхана убур рыхы1ре а, гуджлине хыле лешур а гьадид сураа сиене гвалахбыр, федеральный гудж ад структурамыхьван кине, тарг даъара а террористер ва гьабишды пособникер. Чалыш диъи лап джегьил гадиер, шывга нагьаквалдыбыр гьаъасма, дуьзды ры1къа1 хъыдгас хъур, аа-уу хад дур-ун ад инсанар ки куьмгис дыгыр. Йиъине ки, Дагъыстанди террактбыр бала хъу1гъу1ре адиш.
Республикадид Кьухьнийды Посланиедик гьагва гьыъыр а сиене мисед таликьды суалбыр ва гьаммыд усулбыр, е-ва1 ки, халкьдире, гьадыхда гадкьыр, гене ки чалышене аъ-гъаъ йит1кьыр йыгара Дагъыстандид сава1лид ва сагъва1лид бадана.
Гьадыла ихьды регионад Кьухьние гьухьуд кал, сиенебыр, Россиядид Герой Магомед Нурбагандовад ч1елбыр «Гвалах ва, шуба1!» девиз кал хьури хакьыр, йыхана гвалах ваъара аъ-гъаъ йыдкьыр йыгара, ихьды республика йыгъ-йыгъала лаъ вишин бадана, яшайиш йыха йишин бадана сиенебишды.
Къинады Саид
