29 декабрес Рутульский администрациеди вишир ай депутаташды сессия. Гьа сессиеди хьуъ гет1ир ай кьва1д суал. Сахьусды суал йиъий райондид 2017 сыдыд бюджет кьабыл гьыъын. Кьва1дхьусды суал — шууна райондид кьабыл гьыъыд бюджет гьакьна-кьулна кьуле гыргыр йыгарди.
Сахьусды суалад бадана гьалгыри финансовый отделед кьухьды Карчигай Карчигаев.
Гьание депутаташис ва мадды гьади ягъмиш дишибышис ихтилат гьыъыри, шудаъ йиъиди райондид бюджет ва гьилды идарамыс гьабыр шудаъ пай гьыыъыр ади.
Гьанийды докладала хъуъ гьалгыри Кадимов Магомедриза – главный бухгалтер РУО, райсобраниедид депутат. Гьание анализ гьыъыр ай гьа бюджетед, гьилды статьямыс гъийкьасди, гьилдымыс гъиджийкьасды тангабыр.
Генеки гьади гьалгыри райсобраниедид депутат Ферман Ахмедбеков. Гьанийды суалбыр йиъий гьилды райондид программамыс шудаъ тангабыр лазим йикисды.
Кьва1дхьусды суалад бадана, шууна бюджет кьуле гыргасди хьур, гьалгыри глава администрации МО «Рутульский район» Магомед Магаррамов.
Гьание гьухьури, гьилды идарама шудаъ илсан ади ва гьабишис шудаъ танга вырыхы1рди. Гьадыла ц1инды сыда артухды харджибыр джишин бадана баласды идарама лазимсызды штатбыр сократит хъаъ хьур.
Гьадыла хъуъ гьалгыри райондид кьухьды Ибрагим Ибрагимов. Гьание джуду суруула гьухьури ха1р идарамыд кьухьдыбишде, джуду ари гволахмыд къуллухчийшды арыди кьат1лама ваъ хьур, гьис хьурди бюджете ад танга гъивкьын бадана.
Сиене суалбыр кьуле йыгыдыла хъуъ, депутаташде гьухьури, гьемиди хьуъ гет1ид бюджет кьабыл гьаъсиме, джаъасиме. Депутаташе гьа бюджет кьабыл гьыъыри генеки гьади дегишвалдыбыр гьаъасна. Гьадыхьван сыт1ана гьа депутаташды сессиядид гвалах лап1т1ури.
Ю. МАГОМЕДОВ