Гъийгъа, 4 ноябрес, Дагъыстанад Кьухьды Рамазан Абдулатипов йыхьыр ай Республикадид Центральный инфекционный больницади. Регионад Кьухьнийхьван ай РД-над Правительствадид Седри Абдусамад Гамидов, РД — над здравоохранениедид министр Танка Ибрагимов, Махачкала шегьердид кьухьды Муса Мусаев ва маддыбыр.
Рамазан Абдулатипова ихтилатбыр гьыъыр кют1ибишихьван, хуткунбыр гьыъыр гьабишды ха1л, агьвалат шууна виъиди, шууна ваъара ади гвалах медперсонала. Джухьды суруула, йыха хъу1дибише республикадид Кьухьнийис ихтилат гьыъыр шудаъ йыхана убур рыхы1ре ади джва1ршис духтураше ва медсестрыйше, гьухьур генеки камды-кесды шешин адиш, сиене дава-дарманбыр гъийкьыд аниъи хьур.
Йыха йиъи хьур балана едедбыр адишдыла, Рамазан Абдулатипова генеки гьухьур: «Е бегедене темиз выъыр ай КОР (Канал Октябрьской Революции), инсанашды халма хьед руъуд, амма, баласдыбише, ешемишды каналад бегеде, гьамыъ ки т1авалхъа ваъара мада канал ругъ-ч1ыхы1хьван. Гьалаки хайиш гьаъара сиъинбишда темиз джыъыр марагъ кранады хьед. Е биссамятди гыргара а лазимды гвалахбыр хьед темиз хъишин бадана, Республикадид Правительствадис Роспотребнадзорахьван сыт1а выр а поручениебыр Дагъыстана кьабыл гьаъ хьур лазимды мерабыр КОРад аа-уу темизвалды вишин бадана».
РД-над Кьухьние сагъулбыр гьыъыр больницадид персоналас ваъара ад йыхана гвалахас гюре дагъыстанабишды сагъва1лид бадана.