21 сентябрес Россиядид Президент Владимир Путин гьа1сил йишир йикьид дагъыстанабишды полицейский Магомед Нурбагандовад дидихьван на нинихьван, гьади иштрак гьыъыр ай Дагъыстанад Кьухьды Рамазан Абдулатипова ки.
Гьадид хьурагинды йыгъа ху1киметед Кьухьние къул диъир дестикь выъыр ай Указ полициедид лейтенант Магомед Нурбагандовас выс хьур звание Герой России. Гьад йыхы1р ай 10 июлас дама Сергокала мукъу1д бегеде. Гьа алчахды гвалах бандитеше снимать выъыр ай видеоды. Гьади гьагвара, шууна ярахбыр хад боевикере гудж ваъара ади Нурбагандовас джуьхьван гвалах ваъадбишде гвалахала эхъедиъ хьур, гьадис хъывыд джываб: «Гвалах ваъ, шуьбе!» («Работайте, братья!»)
Россиядид Президенте гьухьур, 22 сентябрес джу официально Кремлиди выс хьур Герой Россиядид Ха1дий. Владимир Путине эккед сагъул-варулбыр гьыъыр Магомед Нурбагандовды дидис не нинис йыхды выр ад духарыс тербиедид бадана.
«Гьад гьекъийкъатды йигит йиъи, ва гьадыла наъгъа за дестикь выъыр Указ гьанийис Российский Федерациедид Героед Ха1дий высды. Гьа герой йиъи, йисхьурди хьа1р инсанад кар диш, йыхьы1с ды гьац1ара, присяга маса джывын, йикьимады джуды халкьдис джан сихьир», — гьухьур РФ-дид Президенте. Владимир Путине гьухьур генеки, гич1ед цынкьылашды гьунар йиъи ярах хадишды эдеми йыхы1н ва гьекъийкъатты йигитешды гьунар йиъи гич1 адишне эджелед хьесыма гакьын.
«Гьа ес баладбишис пример виъи, ва гьанийды ч1елбыр — приказ виъи сиене джуьхьван гвалах ваъабишис. Эккед ва1с сагъул. За йик1иы хъыгара, шууна да1ви выгырди терроризмадыхьван Дагъыстанад ополченцыйше. Гьац1ара, шудыга ч1елмыхьван выхьди дердбыр ц1ам гьаъас джикисды. Амма зас йыгара, ва1с гьац1ыр, Москвади ки, ва сиене Россияди ки сиене ламыс ад, гьакьаллы инсанар гедыркьад, шивди йишид», — гьухьур ху1киметед Кьухьние.
Республикадид халкьдире гьадыла хьурагине, сахьусды кьул джигьилеше, Магомедды гвалах йигитед ка хывкьыр, ва хайиш гьыъыр ай наградадид бадана. Йикьид офицерес эккед ху1киметед награда выр йыгара хьур дерде а1ч1ур ай Дагъыстанад Кьухьды Рамазан Абдулатипов ки, РД-над внутренний гвалахмыд министр Абдурашид Магомедов ки.
«Гьание выъыд гвалах — гьекъийкъатты выгъылныйды виъи, дагъыстанашурад, йикьид Ватан бадана, гьу1мирдихьван йикисне пример ка йигитва1лид, ватан хъывгынва1лид. Гьад рухьуд ч1ел виъи, ес гич1ердиш хьур бандитешила, е гуджли диъи гьабишихъаъ йик1яа на фикирда. Йигара ваъас эккед сагъул сиене дагъыстанабишды суруула дидис, нинис, гьанийды кьухьдыбишис ва гвалахад юлдашешис Магомед Нурбагандовас выр ад тербиедид бадана. «Гьу1мирдихьван йик1иы гъана йикий йигит!» — кихьир ай джуду страницади Инстаграма Рамазан Абдулатипова.