Шудаъ йикIире биъий заари

Зы ха1л йиъи,
Вы ки са ваз.
Йик1ид гьавас
Хабар виъи.
Вакла ки зас
Шудаъ йик1ире
Биъий заари?Гьац1ара зас,
Зала бейкеф
Риъид гьелбет.
Мадиш ихьды
Ширин сюгьбет,
Войисва1лис
Йиший негьлет

Валлагь, изды
Йик1 вахда хъу,
Виригъ кьахды
Сывахда хъу.
Гьу1мир виъи
Къайгъуехьван,
Тек вы риъи,
Дердед лукьман

Йик1иы изды
Бан йишир а,
Сир ашгара
Гьаъас джишир а.
Эй вефасыз,
Шудаъ йик1ире
Биъий заари?

Гьац1 хъафасда
Зы гушур а,
Ми дердере
Лап лешур а,
Дуьнйа зас лап
Дар вишир а,
Шудаъ йик1ире
Биъий заари?

Битав йишир
Ац1ыр аъ сур,
Зы гьурхьури
Вахда хъацур.
Ул хъу джат1ур
Гьаргуныхда,
Шудаъ йик1ире
Биъий заари?

Сахыйне, зы
Некьеа руръура.
Хыл сигыйне,
Сурургара.
Джат1ур, улаа
Лаъ лурубзура,
Шудаъ йик1ире
Биъий заари?

Гьа улабыр
Лап сайил и,
Умуд ай
Ма хайин и.
Гьис гьаса
Фикирли риъи?
Шудаъ йик1ире
Биъий заари?

Йыгъа — выше
Вы йик1иы гъа,
Джанде изды
Мугьу1бетдид
Ялав ана.
Гьурхьара а,
Шудаъ йик1ире
Биъий заари?

Кабаб йишин
Вы себеб риъи,
Са яхъ выды
Сабаб виъи.
Саралмиш маъ,
Миннет виъи,
Шудаъ йик1ире
Биъий заари?

Шах вы ришир
Суркьур йик1е,
Къул гьыъыр ха
Джуду хыле,
Нагъв лувзур
Изды уле,
Шудаъ йик1ире
Биъий заари?

Сувга выъыр
Изды ери,
Гадкъыйне, са
Мелек-Ху1ри.
Ай, ра1химсыз,
Маъ на дели.
Шудаъ йик1ире
Биъий заари?

Мизы ит гъа,
Йик1е — авгъу.
Залымад рыш,
Мидухъун зас
Мылвыц1 къайгъу.
Гьайде гьаса,
Шудаъ йик1ире
Биъий заари?

Гагь-гагь выды
Мизыы гъабыр —
Сувургара
Изды саабыр.
Зы гьулхьадид
Риъи бейхабар,
Шудаъ йик1ире
Биъий заари?

Йыгъ рухьура,
Ваз рухьура,
Джигьил гьу1мир
Ливир виъи.
Гьалыс ваъас
За ми дерди,
Шудаъ йик1ире
Биъий зари ?

Хъыджыгыр гьеч
Заа са суал,
Кьул лувшур
Руъура хиял.
Фелекдире
Гьыъыд ка лал,
Шудаъ йик1ире
Биъий заари?

Хатыыдире
Ливихьна хъа1л,
Гьа риъи
Са улхад ха1л.
Ливирхьвара
Мизы суруш,
Шудаъ йик1ире
Биъий заари?
Зас вы некьихьде гьаргури

Зас вы некьихьде гьаргури,
Гьаргури вазыры гъана.
Иллагьи са Мелек виъи,
Сурутди гьаса нур а.

Быч1ид десте хыле хана,
Зы ки, йийир, вахда йиъи.
Нахджиред гьава ваъара,
Мугьу1бетдид къанатмыхьван.

Сасынийде хай кьва1б ха1дий,
Ихьдыбыр ид кал гьагварай.
Захда гакъыр, яхъ гьаъара,
Закля на вакля гьалгарай.

Тайда йишир лы1хды гыбыл
Зы хъа1шур йыкьа1 ахарай,
Мелекмыра кьат1 гьаъара,
Зас арыда ра1хъ сывхарай.

Быч1имыхда хыл сиргара,
Яхъ гьыъыр, сес ваъара,
Ихьды яхъмыд, сесмыд унду
Зы некьеа уях руъура.

Гюльзада Аль – Рутули.