Дагъыстанад Правительствадид седриед врио сахьусды заместитель Анатолий Карибов кьулу гъана выгыр ай иджлас. Гьади хьуъ гет1ир ай суал 2018 сыда республикади киджитхъынмады Чемпионат Европы гыргас гьа1зыр диъиме хьур.
«Дагъыстанди Чемпионат Европы йыгын — гьа эккед ху1кийметед мероприятие не ха1саб ваъара, гьадыла гьа кьуле выгын бадана, кьул кьулик кид гволахбыр гьыъыр йигара», — гьухьури Анатолий Карибова гьади сыт1а дишидбишды улихьде.
Сиенебишис вац1ал выъыр ай киджитхъынмыд Чемпионат йикисды йиъид 30 апреляла 6 мая йикьама 2018 сыда Каспийск шегьерди Али Алиевды дурухда хъуд Дворец спорта.
Республикадид физический культурадид ва спортад врио министр Зайнал Салаудиновды ч1елмыхьван, Дагъыстандире макъулана гьа1зырвалдыбыр гьаъара а гьа мероприятиедис.
«Гьеми йыгъырма Международный федерациедид киджитхъынмады представителер йидкъыр ай республикади, гьабыр гадкъыр спортивный объектмыхда ва эккед кьиймет выри Дагъыстанас. Гьадыла саваенди гъеблид кьиймет выри гьабыр ешемиш дикисды, сатхасды, люздесды ермыс, ва машинбыр люзе гьаъасды джигабыр кьуле лешур »,- гьухьури Салаудинова.
Гьа иджлас выгыргад арыди ихтилат кийтхьур ай Каспийск шегьерди информационный обеспечение ки кьуле йыгыр йигара хьур, гьадыла саваенди Республиканский конкурс выгыргас хьур а Чемпионат Европадид логотип кьабыл гьаъасна.
Мира Казиева