Махачкала шегьерди иесси адишды тылыймар йыхы1нид а1гьвалат бадана, 9-сен йишид рыш рикьидыла хъуъ вишид, кучума ад тылыймаше эрч1е рыъыда, РД-над Кьухьнийды ва Правительствадид Администрациедид Пресс-службадире хабар вылц1ара.
Лазимды контроль гъадишды ха1йванмашды суал шума иди сихьид йиъи республикадид руководствадире Махачкала шегьердид администрациедид улихьде. Гьа рыш рикьидыла хъуъ Дагъыстанад Кьухьды Рамазан Абдулатипова выр ай указаниебыр ыхьа1 джыъыр кьабыл гьаъ хьур гьадис лейихды гьакьасабыр.
Сахьусды кьул гьухьур ай ваъ хьур мобильный приют — гьа рухьуд ихтилат йиъи кучума ад ха1йванмар хакьыр са ер выъыр гьабыр ийгасды, иесси анийды тыла хъывгасна ва иесси адишдыбыр гьади ари йигыр сатасна.
Хыва1 лешур ай, тылыймар хакьыр гьасад приютма гыргасна, амма меркездид мериядид службамыра гьа гвалах кьуле выгыргара джва1ршис лейих виъид ка.
Гьа хыва1 лешуд гвалахбыр джва1ршда арыди-джаргыди джишийне, ери йыхы1д ва ери яраллы йишид тылыймаше ац1ыр а малдухтурашды бальницабыр.
Джама1хтире къал хывкьыр ай йишид къайгъумыд бадана, гьемидийкьама ад кьухьдыбише джыъыд гвалахбыр хьуъ гийтхьур а, рышаа йибкьыр ад вакьие гьувгуйне джамаха1т арыди хъидживч1ир а. Республикадид прокуратура ва джамаха1т чалыш диъи йишир ад къайгъубыр арыди-джаргыди хъыгас хьур.
Кьухьние указаниебыр выр ай гьа ха1йванмашис ки лейихды спецприютбыр сихьа1ъ хьур.
Гьеми сиене гьаъара ад гволахбыр ва къайгъубыр арыди йыгыр йигара джуду ягъа1д къанынмыхьван, гьис хьурди маа гьасад метлебыр (проблема) хъиджикисне.
Дагъыстандид Кьухьнийды указаниедыхьван Махачкалды йишир ад гьалакьамыхьван сыт1ана (яни гьеми рыш эрч1е рыъыдид тылыймаше) гьади кеп1ир республиканский комиссие РД-над Правительствадид Сахьусды вице-премьер Анатолий Карибов кьулу гъана.
Гьа гволахбыр кьуле гыргас хьур хыва1 лешур а.
Гьеми йыгъырма гьалакьабыр кьабыл гьаъасды йиъи, гьадыхьван сыт1ана гьакьды — нагьакьды вышды-шивди гьац1ара гьаъасна, гьалаше йыхы1р ади ха1йванмар.
Йишир ад къайгъумыд бадана гьалгади, Рамазан Абдулатипова гьухьури: «Дагъыстанабыр мысга кийтхьур дац1адбыр диъий джалахъуъ ки эдеп-ха1я ана, эдемивалды ана малдид, ха1йвандид кьадар, къадри вац1арана аъ-гъаъ диъибыр диъий. Гьеми йыгъырма ад ихтилатмыхьван сыт1ана сасад илсанаше хъа1л гъава1лире киджикад, эдеп-ха1я сызды гволахбыр гьаъара, илсанашды арыди кин иере ва гьухьус гьемибыр гьиладыгабыр диъид ка. Гьаса йишийне ева1 сыт1а хана йыхды гволахбыр гьаъас чалыш дишир йигара.
Кьабыл гьыъыр йигар диш иесси адишды тылыймаше хынимешис ва илсанашис зарар-зиянбыр выр. Дагъыстанабишис ки хайиш гьаъара ха1йванмар мары1х хьур. Джадац1ад илсанаше хьури литхьуд тылыймар рыхы1рей. За хайиш гьаъара джама1хтиде сабырва1лихьван гьа къайгъубыр кьуле гыргасна.
Правительственный комиссиемыда за поручат гьыъыр ай ва шегьердид администрациедиде ки лейихды кьат1лама ваъасна. Джама1хтире не ва къанынбыр хад кьухьдыбише гьа къайгъубыр кикарана кьуле йыгыр йигара, гьис хьурди маа гьасад йикьинвалдыбыр джишин бадана».
