26 ва 27 январес Махачкалди Маil.ru медиапроектмыд ведущий редактораше выгыр ай тренинг «Как управлять интернет СМИ» хьур электронный сайтмы гвалах ваъад журналистешихьван. Тренинг кьвунды йыгъа выгыр ай «Гранд-Плаза» хьур конференц-зала. Гьа гвалахад организатор виъий РД-над печатад ва информациедид Министерство, гьади иштрак гьыъыр регионад журналистеше ва интернет СМИ-мыд редактораше.
Ихьды газетед суруула гьади иштрак гьыъыр ай баш редакторара Б. Б. Магомедова ва са ки отделед редакторара Т. К. Махмудова.
«Ихьды журналистеше эккед гвалах выгыргара а россиядид единый информациедид пространство выъын бадана, адаб, хаIя инсындид лаъ вишин бадана, ватан хъывгасна тербие вын бадана джигьилешис ва атабабыйшды ад йыхды акьасабыр, карбыр кьимет гъана хакьын бадана ихьды джама1хтид арыди, гьадыла СМИ-быр бала йишиныла ваъ, гьамыра йыхана гвалах выъыныла асыллы йиъи информациемыд качество, гьамыд гьамыъды вахтиндис лазимвалды, дюзгинвалды, йиъидка илсанашис хабарбыр гьыъын, ва мадды гьакьасабыр.
Гьадид бадана и е джат1ур мысга сес ваъара гьа1р са специалистешихда, кюмег высды гвалахас ва журналистешды грамотностес»,- гьухьур Бурлият Токболатовара, РД-над печатад ва информациедид министр.
Тренингед гвалах ачых выъыр гьалгыр министред заместитель С. Снегирев, хьели гьади ягъмишдишибишды улихьде гьалгыр З. Зубайруев — РД-над Кьухьнийды ва Правительствадид Администрациедид информационный политикадид управлениедид кьухьды.
Кьвунды йыгъа лекциябыр кьыле гьыъыр Маil.ru медиапроектед шеф-редактор Ольга Сидоровара ва редакционный директор Сергей Паранькова. Гьабише ихтилат гьыъыр, шууна хайир лешусды онлайн-медиадид аудиториядид поведениедыла, шыв метрикабыр гюзет гьыъыр йыгарди реклама вылц1абише ва йидис сахьусды кьул убур йыхы1р йыгарди редакциедид къуллухчийше.
Гъийгъа балад гвалахбыр ассыллы йиъи интернете ад информациедыла.
Гьади гьакьды-кьулды, дюзгинды информацие бала вишин бадана, ихьды регионад йыхды гвалахмыкла сиене дуьнйадис хабар викисне, гьасад тренингмыра эккед кюмег вылц1ара ихьды журналистешис.
Тимур МАХМУДОВ
