Амсар муIкъуIд сельсовет йиъи Курбанов Суракат Надирович. Гьа гвалах гьание ваъара ад 14-хьусды сен йиъи. Гьа сыдырмыд арыди гьание джуула асыллы йиъид балад гвалахбыр кьуле йыгыр анийиъи. Сахьусды выдж гъилы-кьулуу гъана Амцурды дуьз-дьузгюн гьыъыр а хынымешисды спортад площадка. Джигьилешис ер вишир а, гъаъна темизды гьавыдыы дыхьыр дуьлхъесды. Физкультурадис балана убур рыхыIре каIчIур а джигьилер, гьа площадка йишида хъуъ.
ХьаIликана КIаIълиди рыкъIа-кьуле йаIкбыр кIитIир бегьем дишир а. Инсындис гьадире бала рахаIтвалды вишир а ва кьухьды сагъулбыр гьаъара а кIаIълидебише Суракатыс гьадид сураа.
Мистед сыда Амцурдуды сельсоветед Администрациедире иштрак гьаъара ани йиъий «Местные инициативы»-хьур проекте, гьадис лазимды гьазырвалдыбыр гьаъара а. Гьадис гюре конкурса сигыр ай джваIрше гьазыр гьыъыр ад проект беземиш гьаъасды парковый зонадид.
Гьа проект кьуле йыгыйне ва гьа джига дуьз-дьузгюн гьаъас лечIуйне, Амцурдыыды муIкъуIд инсанашис йыхды гъаъ гъаIчур са джигыди сыкьыIсды, са-сынийис гьадгюсды ва кIаъды хынымешис дуьлхъесды джига йикиси.
Гьа конкурс гыргасды йиъи Дагъыстанад экономикадид ва территориальный развитиедид Министерствадире. Гьа Министерствадыыла асыллы йиъи гьа проект хьуъ агъун. Гьадыла райондид кьухьды Сулейманов Давуд Амаевич ки бала дерде ани йиъи Амцурды гьа парк ачых гьыъын бадана. Джуула асылды сиене куьмегбыр выс хьур хыIваI лешур а гьание.
«Мидыла улихьде гьыъыр ад гвалахбыр кьуле гыргади ки, Давуд Амаевиче выр ани йиъий сиене лазимды куьмегбыр, гьанийды гьунурдыхьван йиъи йеда гьеми гвалахбыр гьаъас йичIид. Гьадыла ихьды кьухьнийис эккед сагъул виъи Амцурдуды джамаIхтид сураа ва изды сураа»,- гьухьури Суракат Надировиче.

Зарема Исрафилова