Джаалахьуъ ки ад йиъий, чахутIкIа рухьуд бала мыкьлад, сынийикла-сынийик киджилхъад эзер. Гьадид даваа адишне, бала инсанар дыкьыркьарай. Гьамыъ кал гьадис духтурашда куьмег йичIере, эгер вахтинди хабар вишир, лазимды дава-дарман выъыйне.
Баласды гьа эзер луза хъаъас йичIид, гьадид вакцина игъивидаа хъуъ, кIаъна мадана вырыхыIд. Гьадыла хъуъ кIыб-кIыб хынымешис гьаъара йигара манту-пробабыр, вахтинди гьацIара гьаъад гьа эзер кид-кидишды. ХаIр сыда, сентябрь вазырды хьура хъуъды йыгъырма МыхаIд районди ад поликлиникадид прививочный кабинетере беслемиш ваъара профилактический гвалах туберкулёз эзред бадана. Ми йыгъырма МыхаIд муIкъуIд мехьтебырмыд телебиер дуруъура а тест-пробабыр гьаъас поликлиникади. ХаIр хынхыхда хынымешды духтур гакъыда хъуъ, гьанийды ихтиярахьван лирхьере тест-пробабыр, гьацIара руъуд гьа эзер джанде ама-адишме. «Ми сагьаIтди гьухьус йикиси 90 % -ес уже йыхы1р бегьем йишир а», — йес хабар выри Салманова Пери Шихаевнара, гьа риъи медсестра-вакцинатор райондид больницадид. — Гьадыла гъайир, хумухд кваIчIуйне, гриппеда удухуIд вакцинабыр ки гьаъара кваIч1ур а гриппол, хьур дур гъад давадыхьван, — гьухьури гьание.
«Гьаса йишийне, са хынимешис диш гьа профилактический мерабыр гюзет гьыъыр йигад, — гьухьури районный больницадид духтур Мамедова Саида Абдуллаевнара, — сен арыда сиргара кьухьдыбыр ки йидкьыр флюорографиедид шикил ваъас выр йигара, — эгер хаIр сыда дуъура, макъыет дишихьвна, мааки йыха йиъи. ЧахутIкIадыла аIхтиетвалды гюзет выъын -сиенебишды бырдж йиъи», -гьухьури духтурара.

Зарема Исрафилова