11 сентябрес 2024 сыда Россиядид вице-премьере Александр Новака Дагъыстанад кьухьнийхьван Сергей Меликовыхьван агъмиш гьыъыр суалбыр шууна садана бала кьуле гыргасди региона тукмыд гьакьасабыр ва мадды эккед инфраструктурный проектбыр. РФ-дид правительствадид пресс-службадид хабардихьван, губернаторахьван гьаIсил йишид вахтинди меслягьаIтбыр гьыъыр ай кьабыл ваъас хьур комплексный программа тукмыд гвалахбыр дюз-дюзгин гьаъасды Дагъыстана 2036-хьусды сыдыы йыхыIр. Гьа документере гюзет гьаъас шудаъ кIыб лаъ-хьуъ выгыргасди туризм ва промышленность, гьагва гьыъыр а планбыр гвалахмыд гьазырвалды ваъасды регионад электросетевой комплексере кьыIдис, ва саки кьуле йыгын гвалахбыр регионад программамыд, салааматна лаъ-хьуъ гьаъасды тукмыд идарабыр ва жилищно-коммунальный хозяйствадид гьакьасабыр. Вице-премьере гьадыла саваенди хайиш гьыъыр ай ерлид кьухьдыбишда федеральный ведомствамыхьван сытIа гьазыр гьаъ хьур суалбыр тангабыр йыхыIсды лешун бадана мусор джура гьаъад техникадид комплексбыр ари йыхыIн бадана саджигиди инфраструктурный проектмыхьван Махачкалдид не Каспийскадид хьедмыд на тукад агломерациедид. Тукмыд джетинды гьакьасабырмыд суалбыр июль вазыра Меликова агъмиш гьыъыр ай джуду телеграм-канала, гьухьур, сен-сыдыла тук бала ишлемиш гьаъадыла республикадид плынди а гьазыр выъыр кьуле выгыргас цIинды программа гуджли ваъасды энергетический комплекс. Регионад кьухьнийды чIилмыхьван, гьамыъ ад программа, махкам гьаъасды тукад гьакьасабыр Дагъыстана, выгадка дюзгин диш. «МахкамваIлид Программа гъийгъа дегиш выъыр йыгара гьадыхъаъ лаъ хъуд эккед программадыхьван Дагъыстанад энергетический комплекс мааки дюзгин гьаъасна. Тук бала ишлемиш гьыъын рухьуд чIел виъи, Дагъыстан джатIур йыха вуруъура а хьур. Йиъи, джетинвалдымыхьван тукбыр ара-ара чараасызна келъэре ва йисды сетьбыр ана. Ми гьадхыIд бегедед сыдырма луза гьыъыр а 100 мехьтеб ва гьадыхъунды ки хынимешды садикбыр, миллионмы йыхыIр квадратный метримыд халбыр луза гьыъыр а, ачых гьыъыр а балад промышленный предприятиебыр. Ва гьабыр сине гъанийиъи йисды сетьмы. Ад тукмыд агьвалат махкам ваъасды программа джубра хъу кьыбди йыха вуруъура ад республикадыла. Гьелбетдики. гьадыла гьа цIине хъывыъыр йыгара», — гьухьур регионад кьухьние.
Б. МЫХАIДЫ
