13 ноябрес Дагъыстан Республикадид Кьухьние Сергей Меликова выгыр ай иджлас агъмиш гьаъасды суалбыр, шууна высды кюмег Палестинади ад инсанашис. Гьа хабар республикадид кьухьние выъыр джуды телеграм-канала.
«Гьеми йыгъырмыд арыди йик1иы гъа ягъмиш гьаъас сахьусды 30 тонн кюмгид, гьади йикис сахьусды лазимды карбыр: сиг1асды валыг, улесдыбыр, йыхы1нбыр йит1есды гьакьасабыр. Гьабыр ягъмиш гьаъасды гвалахбыр йе тапширмиш гьыъыр а йес гьац1ад фондмы, мидыла хьуъ ки кюмег выд балад инсанашис, гьабыр йиъи «Чистое сердце» ва «Инсан», — гьухьур Меликова.
Генеки гьухьур ай, кюмег высды гвалахбыр гыргара а республикадид органмыра, спасателеше, благотворителеше, духовенстводире ва сиъин палестинцыйшихда йик1 ешед инсанаше.
«Гьа виъи гьувгад ихьды савалды. Сахьусды йыгъала хъуъ йе сиенебише гьаъара а хаджалат руъура ад гьакьасабырмыд бадана. Мегем дагъыстанабишихда руъуд диш маддыбишды вырды ядалбыр ва дердбыр. Гьухьудкал гьакьаллы Расул Гамзатова, «Эгер маннийды дерд выды джившихьвна, кьа1рды ливир а выды гьу1мир».
Гьамыъ йеда йикиси гьекъийкъатды кюмег выс сектор Газади ад инсанашис: хынимешис, хьылешис ва кьа1сдыбишис», — гьухьур Сергей Меликова.
Дагъыстанад кьухьнийды ч1елмыхьван, кюмег еринды лийкьа гьаъаси Россиядид МЧС-ре. «Гьа ведомствадире гьадис гюре вылц1ара а джурад самолет. Са самолет ес ц1ам виъи. Бегедене генеки а сигасды мадды кюмгид партиебыр. Йе умуд ваъара, да1ви бегедене бегьем викис ва инсанар ма йешемиш хъидикис хьура гине ка. Ихьды сиене дугьа1быр дыркьыбишис гьа давие», — гьухьур регионад кьухьние.

З. Магамедова