Хынимеше хъургъуд тукундыла кепекмыс бек1быр лехъа1пшура, гьабише гьадик кид идвалды хуш-бегемиш ваъара. Амма гьадик ари кини и балад карбыр, джандис зиян вылц1ад. Эвели ихьды ерлид хынымеше гьаъад ий макьалды бек1. Макьалды бек1 гьаъад йиьи «макь» хьур дур гъад укьуд на1кыдикла. Макьбыр липхьура шум кид калды кьа1хьма.

Макьалды на1к ягъмиш ваъас вич1ед йиъи майед вазырды хьура хъуъды йыгъырма, виригъ гъадишды гедене, гьисхьурди виригъ сивт1ийне, лаъ йибкьыд на1к, къуру вишир, ч1ир вуруъура. Майед ваз у1тмиш хъившийне, ари макьала на1к авылгардиш.
Макьмыхда ки шумуб иди джура джинс а, инсындире джилъэдбыйды йиъи кьа1йед макь, гьа малмыра йыхьадбыйды макь йиъи. Баласды йыма1лешис сахад йиъи, кьы1нне гъаъ укь гъамадишды гедене.
Кьа1йед джинс баласды улед укьмыхда ад виъи, гьадыла дюзене кет1ес гьац1ыр йигара, улед укь гьилды йиъиди, тисед гьилды иди, джандис зиян джишин бадана.
Макьалы зазбыр гъад йиъи, гьадыла гьа а1хтиетене ка, са суруула мык1 ливхьир, лука гьыъыр, кант1ыра рат1ура. Уусур саъ гьыъыр сирхьере. Сагьа1лды ара выхьыйне, гьамыд кьу1шмы на гъвабалы на1к сыт1а вуруъура. Уу вишид на1к лувулц1ара ягъмиш ваъара са йилагад гъуругъуе, ва яки духтурашды пробиркади. Ха1рне, ц1ай гихьир бек1 гьухьа гьаъади, къаб т1уджудкьасды йигара. Макьалды кьу1ш ки, джигал уула севир, улес руъуд йиъи, гьадид ки дад ширинды виъи. Макьалды бек1 гьаъас дыхьыйне, хынымешис дайрады мачхул руъура, гьилды дамыд, банад тезед нафас лешуйне, джандис мефегьа1т вылц1ара, гьилды хынымешис гьашкь вуруъура, эгер балана на1к ягъмыш вич1ир ади, гьалдыга бек1 балад йиъид гедене. Амма хынымеше дама гюзет выъыр йигара а1хтиетвалды — бек1 гьухьа дамыда хырыда гьыъыр йигара, гьис хьурди умуд виъи, хатыдихьва1н къуруд укьура ва га1ри-гуриере ца1й хакьас.
Гьыъыд бек1 балагема адгын бадана, гьа кахад йиъи ари кьилирик, хьа1ли, йигад гедене, сидгъа хъыъыр ийчес руъура.

Зарема Исрафилова