Ми гьатхы1д май вазырды байрамырмыд йыгъырма сиени Мыха1д райондид му1къма йишир ай уфтанды концертбыр. Гьади лап йыхана иштрак гьыъыр ай райондид мехьтебырмыд ва культурадид идарамыд къуллухчийше ва гьабишды художественный самодеятельный коллективмыра.
Гьамма, ха1р дыъыр, лап йыхана джуьхьды концертед номербыр гьыъыр ай к1аъды хынимеше ва джегьилеше.
Сахьусды майес райондид культурадид Центра джама1хтис гьагва гьыъыр ай концерт сунначийше ва ансамбль «Аяз»-ад къуллухчийше. Гьасад концертбыр йишир ай сиени районди ад му1къма ки.
Гьадыла саваенди, 9-ды Майес Гъамидишид Йыгъас таликьды мероприятиемык сиени му1къма генеки районди ад артистеше ва кьавалаше иштрак гьыъыр ай.
Амма лап уфтанды концертед программа гьа1зыр выъыр ай райондид культурадид Управлениедире, Мыха1д райондид Кьухьнийды указаниедихьван. Гьади ерли ихьды дур-ун ад артистешила саваенди, дыгыр ай Дагъыстанди ад джама1хдис дац1ад артистер.
Мыха1 байрамад майдана пайдахмыхьван, шармыхьван ва да1гьвидид йигитер кид кьухьды шикильмыхьван выгыр ай ухшер. Концертед программадид ведущей йиъий Мирзабег Азизханов, ва музыкадид куьмег выр ай кьавалашды сводный коллектив «Аяз»-ара.
Миди сиени ихьды райондид му1къма йит1кьыд илсанашис на1нибыр ва мук1быр гьыъыр ай мисед артистеше ва коллективмыра:
— Вели Шахбанов, «Да1видид сес» хьур на1ни гыъыр;
— Мыха1д райондид музыкальный мехьтебед къуллухчийше гьагва гьыъыри джуьхьды номербыр, да1видид натиджедид на1нибыр ва шиъирбыр гьыъыр;
— Мыха1д кву1ндысинди мехьтебед кьухьды классма ад телебиеше гьыъыри кьыле байрамад натиджедид шиъирбыр;
— Хлютады Мира Гусейновад коллективере гьагва гьыъыр ай лап т1арамды мук1быр ва на1нибыр;
— Мыха1 культурадид Управлениеди ц1инене сыт1а хъывыъыд мук1быр гьаъад коллективере, Михаил Гашимов кьулы гъана, мид байрамад майдана гьагва гьыъыр ай лап гъеблид ва уфтанды халкьдид мук1быр;
— Ц1ахы1ребишды дур-ун ад артист Мигьмана Рамазанова гыъыри мук1быр гьаъад на1нибыр урус ва ц1ахы1ребишды ч1илмыла;
— Ильгар Османова гьыъыри азербайджан ч1илылад, бытра1д аваз хъуд, на1нибыр;
— Марал Алисултановара лезги ч1илыла гыъыри мук1быр гьаъад на1нибыр.
Миди на1нибыр гыъыр ай Мыха1ды дур ад артист Шахри Азизхановара шаир Бийзат Рамазановад ч1ельмыхьван сыт1а гьыъыд.
Гьади йыхды гьамыъды эстрадади ад на1нибыр мы1ха1д, урус, лезги ва мадды дагъыстандид халкьмыд ч1елмыла гьыъыри Гюльназ Гаджикурбановара ва мадды артистеше.
Концерт йишир ай лап уфтанна, байрамад йыгъас ухшер вишир.
Гене ки гьухьус йыгара, сиени му1къма ва райцентра йыгыд парадмыд ва «Бессмертный полк»-мыд къулу гъани диъий районди ад Хьичады, Къинады ва Мишлешады кьавалар.
Байрамад концерт ми артистеше лап быт1рана рыкъа1 ийири, гьадыла гьа сиенебишис ваъара сагъул!
Къинады Саид
