Зас баладбыр ки йыгардиш,
Мукъа1 гъад гьадхыд къавахбыр,
Гьабыр кухъудкьур йыгардиш,
Хамада гьамыда таарихбыр.

Зас баладбыр ки йыгардиш,
Дугъруд йишин, инсанвалды,
Гьад йык1ыыла убхасды диш,
Саки вишин джумартвалды.

Зас баладбыр ки йыгардиш,
Лап са душман йишихьвна,
Гьаки зас йикьир йыгардиш,
Белки гийкьыр хъургъухьвна.

Зас баладбырки йыгардиш,
Ц1ыдды ха1ля махьв лугъуйне,
Быч1 къуру йишир йыгардиш,
Ц1амды гьу1мир гьадис выйне.

Зас баладбырки йыгардиш,
Писвалды гъалибне джившин,
Багъыш хъаъас ра1гьим адиш,
Йыхва1лы вы сарвах йишин.

Зас баладбыр ки йыгардиш,
Изды нин дуьнйады гъана,
Дюзды ра1хъ сувгур йыгардиш,
Гьанийхьван е мысга ана.

Зас баладбырки йыгардиш,
Йа1ква1д виригъ банас йывхы1р.
Дуьнйады да1гьви выгардиш,
Выг1ле гуьллимыра йыдхы1р.

Зас баладбырки йыгардиш,
Некьихьде йыванар гьагур,
Агъырды бар гъад выгардиш,
Ха1йкалад нур сусук кагъур.

Зас баладбырки йыгардиш,
Сархас, накь гьыъыр лухъурзас,
Келле лывырсыр йыгардиш,
Ц1удбыр гьаъара лука хъаъас.

Зас баладбырки йыгардиш,
Кихьир а ес дюхуьд йыгъа,
Выфасыз сыхы1р йыгардиш,
Язухъад нагъв лувзур гъугъа.

Зас баладбырки йыгардиш,
Яяла Аллагь рази йишир,
Мида шывга е йихисдиш,
Са эмег ха1лална вишир.

Бийзат РАМАЗАНОВА