Дагъыстанад Кьухьды Сергей Меликов ха1сил йишир республикадид муфтиехьван, шейх Ахмад Афанди Абдулаевыхьван на Абдулла Ацаевыхьван. Агъмиш гьыъыр ай суал, шууна сыт1а выгыргасди гвалах дин не инсанашды савалды мааки гъигъе выъын бадана региона.
Сергей Меликова йик1ыы лихъийир, мистед сен Россиядид президенте гьагва гьыъыр а Россиядид халкьмыд сава1лид Сенне, гьа эккед гвалах виъи, хьур, халкьбыр бала ад Дагъыстанас. Гьание гьухьур, Владимир Путине шумаиди гьухьур ай, республикадире гьувга выъырди савалды джетинвалдыбыр ад вахтинди, меселла, 1999 сыда, ва президенте эккед кьимет вылц1ара дагъыстанабишды гьадатмыс.
«За мысга рухьуд йиъи, Дагъыстана адиш, хьур, бала халкьмыд на динмыд арыди неразивалдыбыр. Анийиъи сасад суалбыр, кьуле гыргад инсанашды ариди», — гьухьур регионад кьухьние.
Дагъыстанад муфтие, шейх Ахмад Афанди Абдулаева гьухьур: «Ц1амды геджет1кьынвалдыбыр руъура бегедебишды арыдики. Ихьды ният — чалыш дишин сатас гьабыр гьаатхы1д сыда ва беслемиш гьаъас ц1инды 2026 сен сава1лихьван».
Шейхере сагъул выъыри Сергей Меликовас выгыргара ад гвалах бадана гьадид сураа региона.
Динмыд деятелере Абдулла Ацаева шыв гьыъыр йыгарди гьухьур, йыха йишин бадана динди ад инсанашды арабар.Хьели эккед кьимет выр Саид Афандире выгыргара ад гвалахас гьу1мирдихьван инсанашды сава1лид бадана.
Сергей Меликова ки вирзир Саид Афандид гвалах дагъыстанабыр ари даъад. «За мысга ху1рмет увуху1д йиъи Саид Афанди шейхед. Гьанийды гьунарахьван вишир ад виъи гъийгъад ихьды секинвалды», — гьухьур гене гьание.
Регионад кьухьние гьухьур, ихьды, мусурманабишды умма махкам виъинехъунки, мааки чалыш дишир йыгара джывыс ихьды душманашде арыди ваъас. «Символично йиъи, е ха1сил дишин Рамадан ваз бегеде виъид вахтинди», — гьухьур бегьем руъуда Сергей Меликова.
Гьади иштрак гьыъыр ай Миннацад кьухьние ки Темирлан Абуталимова.

Насир ИБРАГИМОВ