Дагъыстанад Премьер-министре Абдулмуслим Абдулмуслимова къутливалдыбыр гьыъыри журналистешис, СМИ-мыд къуллухчийшис, издателешис, печатникешис ва сиъинбишис, гьал гвалах ваъара ади медиаиндустрияди, гьабишды байрамад бадана – российский печатад Йыгъас.
«Гьакьдыкьулды ва дюзгинды журналистика мысга инсындире гюзет ваъад виъи, амма гъийгъад вахтинди, дуьнйады инсанашис чалыш диъиди ч1ирине гьагва гьаъас тарихдид гьакьасабыр, гьа маабыйды лазимне вуруъура. Ва1 диъи гьасад инсанар, мысга к1еэ гид информационный фронтад, к1ыбди ва дюзгинне гьагва гьаъад сиене гвалахбыр, региона руъуд, валаетди ва дуьнйады, гьадис гюре халкь мааки са ваъад.
Дагъыстанад СМИ-мыхда анийиъи варлыд таарих ва уфтанды традициябыр. Выхьды гвалах мысга эккед кьимет гъад виъи, дюзгинды ва инсанашды къавгъумыхьде гедыркьад виъи. Ва1дя йиъи инсанашис гьац1ара руъуд сиене лаазимды хабарбыр, ад региона, шегьерма, му1къма.
Эккед кьимет вылц1ара дагъыстанабишды журналистеше выгыргад гвалахас ки республикадид йашайис лаъ-хьуъ йишин бадана, лаъ гелт1ере инсанашды къавгъу-дердимыд суалбыр, гьадыхьван сыт1а мааки гуджли ва гъигъе ваъара инсанашды савалды.
Джураана йыгара сагъул-варул ваъас дюзгинне ва йыхана инсанашис ихтилат гьаъараю, хьур, республикади гыргад юбилеймыд байрамбыр — Год защитника Отечества ва 80-летие Великой Победы.
Эккед ва джурад сагъулбыр гьаъара ихьды СВО-ди иштрак гьаъад журналистешис ва операторашис. Ва1 гьади гвалах ваъара а джандыыла хыл лювшур. Гьакдыкьул ва1, журналистер, диъи ихьды на эскерешды арабыр ари йыгыр йыха гьаъад, йигитешды на гьабишис кюмег гьаъад инсанашды. Выхьды гьунырдыхьвыан йиъи ес ваъац1ара сиенемыд дюзгинды хабар гьади ад акьасабырмыд ва шууна хыл-худ вырыхы1рди ихьды СВО-ди ад йигитешис инсанаше.
Гене сагъул-варул ваъара сиене йыхана гвалах ваъад журналистешис ихьды дагъыстанабыр бадана. Гьац1ара, выхьды чалышва1лире мааки лаъ-хьуъ гыргаси Дагъыстанад дур, ва гьади яшайишед сиене сурбыр.
Ми байрамад йыгъа къисмат гьаъара ва1с сагъды джанбыр, бахт-берекет, эккед кьуве мааки йыхана ваъас гвалах!» – гьухьури РД-над Правительствадид Седрие А. Абдулмуслимова.
Б. МЫХАIДЫ
