Ихьды газетаа баласды хабарбыр е чалыш дуруъура лиес мыха1д ч1илыла. Гьадис гюре, газетере эккед кюмег вылц1ара ц1амды мыха1д халкьдид ч1ел увуху1нис. Кьухьдыбыр шурад ч1илыла далгыйне ки, ала-лаъ диъид хынимешды са-санийды арыди далгын баласды урусала йишир а. Хынимешды хыле хад телефонмыра ва телевизормыра гьабишис джуды ч1илыхъаъ урус ч1ел артухана ха1р вуруъура.
Ихьды хынимешис мыха1 ч1илыла далгас, кьыле гьаъас гьа1шкь вишин бадана, Мыха1бишды газетед башредактор Тимур Махмудова гьа1пхы1д март вазыра хынимешды арыди выгыр ай конкурс «Шурад мыха1 ч1ел»-хьур дур гъад. Гьа конкурса иштрак гьыъын бадана, шыв гьыъыр йигад йиъиди ашкара гьыъыр ай газетед ТГ-канала. Конкурса иштрак гьыъыри мехьтебырма ад телебийше, сиене кине 20-ды хынхыра. Гьабише кьыле гьыъыд мыха1д ч1илылады шиъирбыр ки лийир ай ТГ-канала ва ачых гьыъыр ай сечкибыр. Эн сесбыр бала лешур, хьури гирхьунийс сивурхьара ай — 5 гьагъзыр манут. Кьва1бхьусды ер лювшунийс — 3 гьагъзыр манут ва хьибыдхьусды ераа гъанийис – 2 гьагъзыр манут.
Сечкимыд гьац1-яц1 гьац1ыри 31-хьусды мартас.
Сиене кине 113703 инсындире сесбыр выр ай.
Гьамыкла 40034 сес вишир ай Мыха1 ад 6-хьусды класса кьыле ваъара ад 2-хьусды мехьтебед телеби рышес — Раджабова Рамиля Рамиловнас.
Гьанийла сагьа1лнакал джубра ришири Мыха1дид 1-хьусды мехьтебед телеби, 5 — хьусды класса ад – Алиева Малика Амуровна, гьанийис выр ай 39743 сес. Хьибхьусды ер ки лювшури Джумаева Гюльпери Темуровнара — 1 -хьусды мехьтебед 5 –хьусды класса ад телеби. Гьнийис вишир ай 26145 сес.
Конкурса гьаалиб дишид рышбишихда сес выъыр ай газетед редакциедид идаради. Редакциядид къуллухчийше ва баш редактор Тимур Махмудова кьуле гине сагъулбыр гьъыри гьабишис ки, гьабишихьван кине мадды конкурса иштрак гьыъыд хынимешис ки ва гьабыр ха1р дыъыр ад ма1гьа1лимешиски, чалыш дишир, быт1рана фуланды конкурса иштрак гьыъыри, хьур. Газетед редактор Тимур Махмудова гьухьури: «Захда фикир, ниятбыр анийиъи мирдже маа гыргас гьемисед конкурс. Гьадыла ва1даа хайиш гьаъара, йикисды конкурса мааки йыхана иштрак гьаъас чалыш диш. Гьадийкьама ха1р гьаъ дуьзене кьыле гьаъас, кьихьис ва йик1ыылана ха1р гьаъас мыха1 ч1илылады шиъирбыр, мисалаабыр. Кьыле гьаъ ихьды газет, гьади лиере а ха1ммише мыха1 ч1илылады ихьды шаъиреше кихьир ад быт1рад шиъирбыр. К1ыб-к1ыб лиере мыха1д миллитдид эвелды махвбыр ва мадды тисед ха1р-джура ихтилатбыр, лиере а сулгара ад ихьды мыха1бишды ч1елбыр. Гьадыла газет кьыле гьыъыйне, ва1с гьадикла йикиси эккед хайир».
Тимур Махмудова джуды хылаа хьибдысинды рышес выри грамотабыр ва джва1ршис ситхьур ад тангабыр. Гьадыла саваенди гьабишис выри ихьды гьа1рфбыр кид алфаавит ва ц1инды игъитхьур ад газетед номер.
Хынимер дишири эккене гуямиш, гьабише гьухьури: «Е рази дъиъи мирдже ки иштрак гьаъас гьемисед конкурсма ва мидыла хъуъ е мааки артухана чалыш дикиси ха1р ваъас ихьды нинды ч1ел».
Зарема Исрафилова
