Дагъыстан – бытIрад ва балад миллетбыр ад регион виъи Россияди, дур-ун ад са джуду джурад маданиетдыхьван ва гьадат-нубатмыхьван ваъ, гьадыла гъайри бала уфтанды сельскохозяйственный продукциемыд ки, меселла, чIаблад якыдидки (баранинадид). Гъийгъа мадды са-кьваIд регионахьан сытIа республика хьура гинивиъи ихьды валаетди гьа як игъийинис.
Дагъыстанад сельский хозяйствадид ва продовольствиедид министред Мухтарбий Аджековад хабардихьван, 2024 сыда октябрь вазырыы йыхыIр республикади анйиъи 5 миллион чIабалашды на цIиешды, гьа йиъи 21 % сиене чIабалашды Россияди ад. ГьаIр сыда ихьды региона агъахара а 75 гьагъзыр тонн сагъды чIабалашды якыдид. Сиене ад республикади якыдикла 15 гьагъзыр тонн (20%) сиргара а мадды хуIкиметма на ва мадды регионма, гьадихьван сытIа рухьуд чIел виъи, ихьды идды чIаблад якыды эккед кьимет гъа, хьур.
Як, темизды банымылады на сывымылады, ухьтанды дад хъуд йиъи мадды якымыхъаъ, гьадыла гьа мысга лебшура ерлид инсанашила гъайри мадды регионмыд инсанашеки.
ГьаатхыIд хьибды сыда Дагъыстанди эккене цIине хъывыъыр а якыдид промышленность: гьыъыр а чIабалар руьлгед ва къасаб гьаъад ербыр са ыйгъа 200 тонн, гьадис гюре бала руъура гьазыр гьаъас гъаъ сигасды якбыр. ЧIаблад як региона — са улесды диш, гьа ихьды культурадид пай виъи, ишлемиш ваъад джалахьуъды атабабышды улесдымыхьван, меселла, хъинкIий-хинкIар, шашлык. Ерлид инсанаше йыхана хуIрметдыхьван уIхуIре атабабыйшды эвелды гьадат-нубатбыр, ва чалыш диъи гьабыр суга джаъас.
Гьадыла, дагъыстанабишды чIаблад як са дур ад улесды диш. Гьа ихьды маданиетдид гьадат-нубат йиъи, йыгъ-йыгъала лаъ-хьуъ йиъид, гьадис гюре гьа мааки балана ягъаIси ихьды регионмыла гъайри мадды хуIкиметмаки.

Б. МЫХАIДЫ