12 декабрес Российский Федерациедид Конституциядид Йыгъа МыхаIд Идаят Гусейновад дурухда хъуд сахьусды мехьтебе ад хынымеше не магьаIлимеше благотворительный акция йыгыр ай.
Гьабише сытIа гьыъыр ай джваIршда лягъуIдкалды посылкабыр, кихьир ай ихьды эскерешис кагъатбыр Украинади гыргара ад специальный военный операциеди иштрак гьаъара ад.
Гьемисед патриотический акциямыра гьагва гьаъара ихьды савалды, алалаъ диъид хынимешды йикI диъинвалды джваIршила кьухьды джигьилешыхда, СВО-ди ад юлдашешихда.
МыхаIд сахьусды мехьтебед директор Ямудин Таибовды ихтилатахьван, хынимеше не магьаIлимеше выъыр а бала уфтанды гвалах, ес гьацIара, хьур, СВО-ди ад йигитешыхда лазимды йиъидухъунды карбыр ад, амани е мида сигыр ад посылкабыр на кихьир ад кагъатмыра йигитешис гьацIаси джуьхьды джыбра ватан на джамахаIт хъуд.
СытIа гьыъыр ад карбыр выри ихьды МыхаIд районди ад пограничникешде хъуъ СВО-ди ад йигитешы лийкьа гьаъ, хьур, гьухьури Ямудин магьаIлимере.
Сиене СВО-ди иштрак гьаъараъадбыр сагъана, шадана гъаалиб дишир джуьхьды халмы-лахмы лехъедкьый!

Насир Ибрагимов