ГьаатхыIд улджумад йыгъа, 13-хьусды декабрес, райондид администрациедид актовый зала МыхаIд райондид кьухьние Давуд Сулейманова выгыр ай иджлас. Гьади иштрак гьыъыри РД-над Халкьдид Маджлисед депутата Шафи Абдуллаева, районад депутаташды Иджласад седрие Назим Рагимова, районад кьухьнийды заместителе Арсен Кулиева, сельсоветмыд седрийше ва мадды райондид идарамыд кьухьдыбише. Иджласа агъмиш гьыъыр хьуд суал.
Шууна виъиди хумухдид армиди дыгыргад срочникешды призывад агьвалат ва шыв гвалах выгыргара ади инсанашихьван контракт китIин бадана РФ-дид Вооруженный силамыхьван, хьур, сахьусды суалад бадана гьалгыри районад кьухьнийды безопасностед гвалахмыд заместитель Насир Раджабов. Гьание ад агьвалатахьван гьадид сураа тааныш дыъыдыла хъуъ иштракчиер, хайиш гьыъыр сельсоветмыд седрийшда ва учетат столад къуллухчийшда мааки балана убур йыIх, хьур, гьа гвалахмыс мабад вахтинди 30-хьусды декаабря йыхыIр.
2025-хьусды ва плановый 2026-2027-хьусды сыдырмыд вахтиндид МыхаIд районад консолидированный бюджетед бадана чIел выр ай районад финансовый отделед кьухьнийды заместителеде Лимунат Нажмудиновада. Гьание тааныш дыъыр ягъмиш дишибыр кьабыл гьаъара ад цIинды райондид бюджетехьван, гьади йишир ад дегишвалдымыхьван ва гьагва гьыъыр ад гвалахмыс тангымыхьван. Гьа цIинды бюджет е бегедене газета лийис.
Хьибыдхьусды суал — вергимыд ва мадды тангымыд, консолидированный бюджете йыдкьыр йыгад мистед сыда — агъмиш гьыъыр районад финансовый отделед кьухьние Умахан Гусейнова. Гьание ашкара гьыъыдыла хъуъ мидийкьама ягъмиш гьыъыд вергибыр (налогбыр) ва йыдкьыр ад мадды доходбыр, районад кьухьды эккене нерази йишири ад агьвалата гьадид сураа. Йисхьурди сасад сельсоветмыра гьала кьуле йыгыр адиш сыдыд планбыр. Меселла, Хлютский, МыхаIд, Мишлешский ва мадды сасад сельсоветмыра гьала сиене сытIа гьа гвалахбыр кьуле йыгыр а 30%-та ва гьадыла цIамна балана ка. Себеб шивди ва йис ади гьасад гьакьасаб гъийгъа, гъаъ сен лабтIуд вахтинди, хьур, районад кьухьние Давуд Сулейманова хуткунбыр гьыъыри лаъ луза гьаъара хаIр сельсоветед седриеда. Мабад вахт йицIыд йыгъ йиъи, эгер гьа вахтинди сиене лаазимды налогбыр ягъмиш гьыъыр бегьем джитшихьвна, выдж маджбыр йикиси гьасад седриер дегишдаъасды кьарар кьабыл гьаъас, хьур.
Гьадыла хъуъ ГИС ЖКХ-дид объектмыд данныймыд суалакла гьалгыри ведущий къуллухчи Джамал Разаков.
Хьидмыд источникмыд межевой планбыр кьуле йыгынид суал агъмиш гьыъыри райондид администрациедид юридический отделед кьухьние Мурад Рагимова.
Б. МЫХАIДЫ
