Бегедене Мыха1д райондид кьухьды Давуд Амаевич Сулейманов ха1сил йишир ай джуду кабинете специальный военный операциеди иштрак гьаъара ад эскерешихьван, хъидкьыр ад халма к1аъды отпускади. Гьа арыди агъмиш гьыъыр ай бала лазимды гъийгъад йыгъа суалбыр ихьды СВО-дид иштракчийшихьван.
Райондид кухьнихьван су1гьбетбыр ва ихтилатбыр гьаъас йыдкьыр ай Саидахмед Бекирович Ибрагимов, Курбанали Рамазанович Байрамов, Шахмир Бекирович Ибрагимов ва Халил Джамалович Джамалов. Ха1рние кьухьнийс джуду эскерва1лид гьакьасабырмыкла ихтилатбыр гьыъыри, шууна иштрак гьаъара ади да1гьвие, шыв фикир-хиялбыр джва1ршихда руъурди гьади, гедыркьара, хьур, шудаъ эккед кьимет гъад, бала лазимды гвалах ваъара ади Ватан бадана, гаджадкьы1р сиене джетинвалдымыхда.
Гьади гене ч1ел лювшур лалгыр ай Лейсан Шахбановна Абдуллаева, «Защитники Отечества»-хьур фондад представитель. Гьание ихтилат гьыъыри, шууна фондара хыл-худ вырыхы1ре ади, куьмег вылц1ара ади СВО-ди иштрак гьаъара ад джигьилешис ва гьабишды хизынмыс. Ягъмиш диширъабыр гьади сиене рази дишир Лейсан-ришид ихтилатмы.
Давуд Амаевиче эккед гвалахна хакьыр хыл-худ йывхы1н ихьды йигитешис ва йе сиенебише сыные-са хадкьыр йыгара джетинды вахтинди, савалды мааки гъигъе выъыр йыгара, хьур, гьухьури. Гьание эккед сагъул-варулбыр гьыъыр ха1р эскерес джурана, гьабишды йигитва1лис, Ватан уву1ху1ре гьувга ваъара ад.
Специальный военный операциедид иштракчийшихьван ха1сил дишин ва гьабишды дерде дишин, лазимды убур йыхы1н гьабишыхда ад суалмыс, джетинды гьакьасабырмыс, гьабишды хизынмыс Мыха1д районди мысга вагыргара ад гвалах виъи.

Расим Таибов