25-хьусды апрелес ихьды ху1киймете йыгыр ай джама1хтид субботник. Сиене райондид идарамыд къуллухчийше, мехьтебырмыд телебийше ва сиене джама1хтире сыт1ана, хыл-хыле выр субботнике иштрак гьъыр ай. Сиене идарамыд къуллухчийше йик1 сихьир балад гвалахбыр гьыъыр ай. Pаlхъбыр, кучебыр темиз гьыъыр ай ва вахбыр игъийир ай, идарамыд, больницадид, мехьтебырмыд бегеде хад. Ма1хлебыр темиз гьыъыр, к1алба хъыгыр ай хынимеше джуьхьды мехьтебырмыд хьуъна гид. Юкьсура руг-ч1ых ягьмиш гьыъыр темизвалды вьыъыр ай му1къа1.
Субботнике йик1 сихьир иштрак гьыъыр хьуланды идарамыра: больницадире, культурадид Управлениедире, ЦСОН идарадире, хынимешды садикмыд ва мадды идарамыд къуллухчийше. Райондид ра1хъ-кьул, шеребыр, ма1хлебыр темиз йишир, усул гъана йишир ай.
Дейрады гвалахбыр гьыъыр ай сахьусды мехьтебед бегеде гид Гъаалибва1лид сквер-хьур дур гьад парка. Гьа парк — хынымер дуьлхъед, инсанар дуруъуд, сыдыркьа1д ва кьухьды маджлисбыр гыргад джига йиъи. Мида бейдене 9-хьусды майед парад гьади гыргасды йиъи, гьис хьурди гьади сихьир ани йиъи сириллабыр ВОВ-ди иштрак гьыъыд эскерешды дурубыр кихьир ад. Гьадыла гьа джига усла йыгынис балана убур выри. Сквер темиз гьаъас, хьур, хыва1 лешури райондид администрациедид ва мадды идарамыд къуллухчийше. Сиенебыр ари ха1ч1ур гьадид ер-юртбыр быт1рана усла-к1алба йыгыри.
Мадад идарамыд къуллухчийше ва мехьтебырмыд телебийшеки кьул-джубурна иштрак гьыъыри темизвалды выъынид, увуху1нид акциеди.
Мыха1бишды газет агъахад идарадид къуллухчийше ки иштрак гьыъыри Всероссийский субботнике. Гьа йыгъа гьабише езири ха1р джура быч1быр, геледжек гьабыр лаъ йидкьыйне, шилвалды, быт1рад усул викисне.
Гьадыла саваенди руг-ч1ы1х темиз гьыъыри редакциедид идарадид са1ргъа1тала гъаъна гид джигима.
Ха1рние джуда вуруъуд гвалах йик1 сихьир ваъара чалыш диъий, лешур хыле бербыр на ч1еверхийбыр ва мугулбыр, хьырысбыр. Уфтанды кIалыб, усул йыбкьыри районди ад муIкъмы, субботник йыгыдыла хъуъ.
«Гьемисе сытIана, ари хана, хыл хыле выр гвалах ваъади, коллективмыд арыди ки ху1рмет къалин вуруъура, гвалах ки к1ыб гувгъуIре. Эккед сагъул виъи гъийгъа субботнике иштрак гьыъыдбишис», — гьухьури райондид кьухьные Ширин Омарова.
Зарема Исрафилова
