Ми йыгъырма яхда редакциеди аlчlур ай Хьичаады мыхаlбишды шаир Саид Гусейнов. Мысга, вахт вишийне, Саид-шу руъура мийманна ихьды гвалахаа, джуду эккед ешдыхда гаджакьыр. 2015-хьусды сыдыла хъуъ гьание сотрудничать гьаъара ад йиъи «Мыхаlбишды цlинды хабарбыр» газетехьван. Гьадыла хьурагине шаир Саиде баласды шиъирбыр кирхьерей йырг ва азербайджан чlилыла, китабыр ки игъиерей гьа чlилмыла. Балад вахтинды гьарибваlли ана, хабар адиший Саид-шус, мыхаlбишды чlилыхда кихьин-кагъун йишир ад ва газет агъахара ад мыхаlд чlилыла. Гьасад хабар гьанийис вишир ватанды хъиркьыйне.
Шиъирбыр ихьды шаир Саиде кирхьере ай хыныхваlля хъуъ мыхаlд ки, азербайджан ки ва йырг чlилыла ки. Амма кьиямат шиъирбыр ихьды чилылад гьилине лийир адиший, хакьыр ацlыд тетрадбыр хала. Районди хъиркьыдаа Саид руъура йишир ихьды редакциеди джуду шиъирбыр хана, андах анака, бегемиш йикисиймихь, хьур, инсанашис, эгер лийихьна газета. Сыдыд арыди йе лахара ай Саид шуд шиъирбыр газета. Мысга джатlур руъура редакциеди, кьаlcды инсан чалыш ий джуду шиъирбыр дюз-дюзгин гьаъас, кьалба, усла гыргас мыхаlд гьаlрфбыр, джу джус гьацlад кал кихьир ад.
Сиене шиъирбыр газета лийыдыла хъуъ, Саид Султановиче агъахара сахьусды джуду китаб мыха1д ч1илылад шиъирмыд «КIыъды мыхра кьухьды йикI» хьур («В маленькой груди большое сердце»). Гъийгъа ки, ешдыхда гаджакьыр, шаире кирхьере а ц1инды шиъирбыр, джуду ч1елмыхьван, маа са китабас гъийкьыбыр гьазыр гьыъыр а. Йыкьасды мидыла хъуъ номерма газетед ва1да йикис тааныш дикис Саид шуд ц1инды шиъирмыхьван.
Баладбишис йыхана хабар диш, выш йиъиди, гьилаады йиъиды ихьды Саид шаир, гьадыла е генеки лахъахара миди гьанийды биографие.
Мыха1бишды ва лезгийшды шаир Саид Султанович Гусейнов 1936-ды сыдыд 3 февралас Рутул райондид Киче му1къа1 нинис йишири. Саидды дид, Гусейнов Султан, савадлы, дагь-дид му1къма магьаIлим, ВКП(б) — дид райкомад инструктор, да1гьвидид ветеран йишири. Нин шаиред, Нуржан, — да1гьвидид сыдырма, сиъин нинабаше ка, эскерешис куьмег выд, кьаIсды гаг, га1нин, 5 велед удуху1д хьыдылды риъий. Дид не нин са шумуд наградамыс лейих дишид зегьметкешер диъий.
Саид Гусейнова 10 класс лаабтIа выъыр, 4 сыда Черноморский флота къуллух выъыри. Гьеми сыдырма гьание са сыдыд радиомеханикешды младший специалистер гьазыр даъад мехьтеб лап йыхана лаабтIа выъыр, гемимыд старший механик йишири. Армиди ад сыдырма Саид Гусейновас ЦК комсомолад Почетный грамота, 10 йыгь отпускадид, дидис, нинис чухсагъулад кагъат, военный частед пайдахад хьура шикил ва са шумуд иди мадды грамотабыр гьа1р байрамас выри.
1959- 1963 сыдырма Каспийскадид «Дагдизель» завода рабочийне, хьели 2 сыда участкадид мастерне гвалах выъыри. Гьа сыдырма шегьердид горком комсомолад бюроед член ки йишири.
1963 — 1969 сыдырма Ленинграддид НИИ-дид, Молдавияди ад, гемимыд ц1инды радиоаппаратурабыр игъиед экспериментальный завода радиорегулировщикне гвалаха йишири.
1969 — 1980 сыдырма Казандид радиозаводад, Горький шегьердид авиациядид заводад гарантийный отделе радиорегулировщикне гвалах выъыри. Саид Гусейнов йиъий отличник пятилеткадид, гьадыла шикил заводад «Доска почетады» гъай.
Саид Гусейновды шаирва1ликла далгыхьвна… Гьание гьеле 5-ды класса ана шиъирбыр кирхьере чалыш ий, сифте азербайджан, хьели лезги ва мыха1д чIилыла.
Б. МыхаIды
