Дагъыстандид кьухьды Сергей Меликова сигыр ай эккед гуманитарный куьмег СВО-ди иштрак гьаъара ад эскерешис.
Гьа посылкама ари ани йиъий – квадроциклбыр, квадрокоптербыр, вышед прицелбыр, радиостанциебыр, инженерный защита гьаъасды карбыр, бензогенераторбыр, внешний аккумуляторбыр, спутниковый оборудованиедид комплектбыр.
«Гьеми карбыр ес бала лазимды, герекдыбыр йиъи, гьамыкла эккед куьмег йикиси боевой задачабыр кьуле гыргад гедене», — гьухьури сабыйды эскерере.
Фуланды карбыр еринды лийкьа гьыъынид кьулуу гъани виъий Дагъыстанди ад Постпредство Россиядид кьухьнийды хылихьде гвалах ваъара ад ва эккед куьмег выр ай «Единство»-хьур фондара.
Гьадис гюре Сергей Меликова гьухьури, гьеми е силгара ад куьмег йиъи ихьды йигитешис, гьабишис цIам раIхаIтвалды вишин бадана, яни гьабыр ихьды ватан бадана джан сихьир ад инсанар диъи. Гьеми еда гьабишис лювчIур ад сагьаIлды хуIрмет виъи.
ЙикIыы лихъиес йигара, СВО беслемиш гьыъыд йыгъала хъуъ Дагъыстандире гьадиъ сигыр анийиъи 25 гьагъзырала артухды тонбыр гуманитарный грузад.
«СВО-ди иштрак гьаъара ад Дагъыстандады гадийшды йигитвалдымыкла зас кид-кине хабарбыр сиргара командиреше ва гьабишды йигитваIлид гьунармыд ихтилатбыр зас иршере хуIкийметед кьухьдыбишда ки. Гьабишис ад джетинвалдымыкла ес-ваIс сиенебишис хабар виъи. Гьадыла ихьды бырдж йиъи йишидихъун балад куьмег вын ихьды йигитешис», — гьухьури регионад кьухьние.

Зарема Исрафилова