26-хьусды декабрес, Ц1инды сыдыд байрам бегеде виъина ад вахтинди, мехьтебырмыра, хынымешды садикмыра ва мадды гьасад идарамыра гыргара ка1ч1ур ай новогодний утренникбыр. Гьа йыгъа Мыха1 ад «Улыбка» садикед къуллухчийше ки джуьхьды хынымешис выъыр Ц1инды сыдыд байрам.

Гьа гвалах кьуле выгын бадана, садике гвалах ваъабише к1ыблахъуъ гьазырвалдыбыр гьаъара анийиъий. Сахьусды кьул, ха1р гьыъыр ай хынымешис байрамад йыгъа кьыле гьаъасды шиъирбыр, шумаиди хылис йыгыр гьагва гьаъасды сценкамыд репетициябыр, ха1р джурудид дуьлхъуьнбыр хынимешис гьагва гьыъыр ай. Байрамас лейихене усла йыгыр ай кабинетбыр, масалмыс йыхы1р ай кьухьды стэндбыр, бала быт1рана беземиш гьыъыр ай ёлкабыр ки. Ха1рне, байрам кьуле выгыргара ад йыгъа, сиене гьазырвалды выъыр, бегьем дишир ай.
Ц1инды сыдыд байрамад утренникек иштрак гьыъыри садике ад хынымеше, гьабишды магьа1лимеше ва хынымешды нинабаше.
Ц1инды сыдыд байрамад сахьусды ухшер виъи Дед Мороз на Снегурочка: гьасад усул выгыр ай джва1ршы Гусейнова Арина Гасиновнара на Джемирзоева Лейла Владимировнара. Сиене хынымешы лыъыр ай байрамас лейихене валыгмар. Дед Мороз на Снегурочка мийманва1ле а1ч1ур ай ха1р группади ад хынымешихда. Хынымеше гьабишис кьыле гьыъыри джва1р ха1р гьыъыр ад шиъирбыр ва гьагва гьыъыри сихьир ад махвалмык кид калды сценкабыр, гьыъыри на1гьнибыр ва сыт1ана гьыъыри мук1быр, йыхы1ри шикилбыр.
Дед Морозара на Снегурочкара джуьхьды нубытда выри хынимешды хыле ари иддыбыр ихьир ад подарокмыд кьуцурбыр. Хынымешис вишири дайрады шадвалды.
Гьухьусна рази диъий выгыд мероприятиеды хынымешды нинабар ки. Гьади байрама иштрак гьыъыд сабыйды хынхыд нин урусатдады риъи, джуды хизындихьван Мыха1 ешемиш риъид. Гьание джуды хынхыд магьа1лимес Гусейнова Бестина Гасиновнас ва садикед кьухьды Махмудова Саида Пашаевнас гьыъыри эккед сагъулбыр, гьемисе быт1рана ха1р хылис кьуле гыргара хьур мероприятиебыр.

Зарема Исрафилова