22 июнас дыркьыбыр йик1ыы хъыдгад Йыгъа Дагъыстандид врио Кьухды Фёдор Щукин ха1сил йишир ай бегедебишихьан эскерешды, дыркьыд специальный военный операцие гыргара. Регионад Кьухьние йик1ыы хъыдгыр дыркьыд эскерер, лихьир быч1быр гьабишды шикилмыд бегеде ва ч1елбыр гъыъыр гьабишды бегедебишис.
Иштракчийшде гьади Фёдор Щукине гьухьур, дагъыстанабишды эскерешды йигитва1лид гвалахбыр адгаса табата таарихди ва йик1е республикадид. Великий Отечественный да1гьвиед не гьамыъды гьакьасабыр ари хихьир, гьание гьухьур, гъийгъа ки россиядид эскереше ма выгыргара а да1гьви фашизмадихьан, джуьхьды дидабаше гьыъыд хайиш гюзет гьыъыр Ватан уву1х, хьур. Йык1ыы хъыдгас, хьур, да1гьвида дыркьыр хъиджыдкьыд йигитер, выъыр ай гийтхьинид т1екьикье.
Гьа мероприятиеди гене иштрак гьыъыр ай Дагъыстандид профильный министерствамыд кьухьдыбише, муниципальный образованиемыд кьухьдыбише, социальный фондмыд ва халкьмыд объединениемыд инсанаше. Гьабише йиъид-йиъид кал быт1раана кьуле эдир эскерешды хизанбыр шыв куьмегбыр гьабишис ади ху1кийметед ва регионад суруула.
Гиркьа, ры1хъбыр джыъыр дыркьыбишды бегедебише суалбыр выр гьац1ара гьыъыр джва1ршис лазимды гьакьасабыр. Ха1р суалад бадана Фёдор Щукин гьади мадана тапширмиш дыъыр гьабыр кьуле гыргас йикисды кьухьдыбыр. Гьание гьухьур гьади ягъмиш дишибишде, са суал ки адгасдиш убур джыхы1р, ва гьади бегьем дишидыла хъуъ агъмиш гьаъас ха1рнийды суал джураана, камерабыр ва журналистер адишне.
Регионад Кьухьние гьухьур, ха1р обращение хакьас, хьур, джуды контроля ва гьазыр йиъи ха1р са инсан кьабыл гьаъас джуды кабинете, эгер гьабишды суалбыр кьуле джыгыхьна еринды вахтинди.

Б. МЫХАIДЫ